उत्तर कोरियापाखें समुद्रं कयेकीगु क्षेप्यास्त्र परीक्षण
उत्तर कोरियां न्हूकथंया ब्यालेस्टिक क्षेप्यास्त्र परीक्षण याःगु पुष्टि जूगु दु । परमाणु अस्त्र क्वबिइफुगु उगु क्षेप्यास्त्रया परीक्षण उत्तर कोरियां थ्व दँय् जक याःगु झिंछक्वःगु परीक्षण खः । उगु क्षेप्यास्त्र समुद्र क्वं पनडुब्बीपाखें कयेकीगु क्षेप्यास्त्र खः । पनडुब्बीपाखें कयेके जिउगु क्षेप्यास्त्र दुगु धयागुया अर्थ उत्तर कोरियायाके आः सीमा पिने च्वनाः नं क्षेप्यास्त्र कयेकेगु सामथ्र्य दुगु खः ।
दक्षिण कोरिायया कथं थ्व क्षेप्यास्त्र ४५० किलोमिटर तापाक व ९१० किलोमिटर उचाइ कायेधुंकाः समुद्रय् कुतुंवंगु खः । थुकिया अर्थ उगु क्षेप्यास्त्र अन्तर्राष्ट्रिय अन्तरिक्ष केन्द्र दुगु थाय् स्वयां निदुगं च्वय् तक थ्यंगु खः । उत्तर कोरियां न्हापा नं थ्व स्वयां च्वय् थ्यंक थहांवंगु क्षेप्यास्त्र परीक्षण यायेधुंकूगु दु ।
अमेरिकालिसे हाकनं निसशस्त्रीकरण सम्बन्धी वार्ता सुरु यायेगु धाःगु छुं ई लिपा हे उत्तर कोरियां थ्व परीक्षण याःगु खः । बुधवाः स्थानीय ई कथं सुथय् ७ बजे थ्व परीक्षण याःगु खः । उत्तर कोरियाली समाचार संस्था केसीएनएया कथं बाह्य आक्रमणया जोखिम म्होयायेत दयेकूगु पुक्गुक्सङ–३ क्षेप्यास्त्र आकाशपाखे कयेकाछ्वःगु खः ।
थुकी जःलाखःला देय्यात छुं कथंया लिच्वः मलाःगु खँ नं समाचारय् धयातःगु दु ।पनडुब्बली पाखें कयेकीगु क्षेप्यास्त्र जुल धायेवं समुद्रया न्ह्यागु थासं नं कयेकेफइगु जुइ, अले थुकियात काचाक्क लुइके नं फइमखु । रोयटर्सया कथं सन् १९९० या दशकय् दयेकूगु उत्तर कोरियाया पनडुब्बीत ७ हजार किमि तक यात्रा यायेगु क्षमता दु । तर थ्व पनडुब्बी सः धाःसा तसः पिकाइ ।
LEAVE YOUR COMMENTS