सुष्मा स्वराज मन्त

भारतया पुलांम्ह विदेशमन्त्री सुष्मा स्वराज मंगलवाः चान्हय् मन्त । वय्कः ६७ दँ दुम्ह खः । स्वराज आकाझाकां उसाँय् मदयेवं मंगलवाः हे अल इन्डिया इन्स्टिच्यूट अफ मेडिकल साइन्सेस (एम्स)य् भर्ना याःगु खः । मंगलवाः बहनी ९ बजे तक टिभि स्वयाच्वनादीम्ह वय्कः आकाझाकां म्हमफया वंगु खः ।

थ्वयां न्ह्यव वय्कलं न्हिनय् छगू ट्विट यासें सरकारं संविधानया धारा ३७० खारेज यानाः काश्मिरया विशेषाधिकार खारेज याःगु खँय् भारतीय प्रधानमन्त्री नरेन्द्र मोदीया सहसिक पलाः धकाः बधाइ बियादीगु खः । वय्कःयात आकाझाकां कार्डिएक अरेस्ट जूगु खँ धाःगु दु । आकाझाकां कार्डिएक अरेस्ट जुयाः मुटुया धडकन गडबड जुयाः वय्कः मदुगु खँ चिकित्सकतय्सं धाःगु दु ।

वय्कः विदेशमन्त्री जुया च्वनादीबलय् हे म्हं मफयाच्वंम्ह खः । अथे जूगुलिं वय्कलं स्वास्थ्यया कारण क्यनाः सन् २०१९ या लोकसभाया चुनाव नं मल्वाःगु खः । विदेशमन्त्री जुयाच्वनादीबलय् वय्कः वाकपटुता व भाषण कलाया कारणं तसकं चर्चाय् वयाच्वनादीम्ह खः । वय्कः नेपाःया प्रधानमन्त्री केपी ओलीलिसे नं बांलाःगु स्वापू दुम्ह खः ।

प्रधानमन्त्री केपी ओलीं स्वराज मदुगु खँय् छगू ट्विट यासें दुःख प्वंकूगु दु । वय्कलं थःगु ट्विटय् स्वराजं थःत किजा धकाः सम्बोधन याइगु खँ न्ह्यथनादीगु दु । भारतया विदेश मन्त्री जूम्ह स्वराज इन्दिरा गान्धी धुंकाःया छम्हयां छम्ह जक मिसा नेतृ खः । विदेशमन्त्री जुयाच्वंगु इलय् स्वराज ट्विटर तसकं सक्रिय जुयाच्वनादीम्ह खः ।