झिंस्वन्हु लिपा इरानय् आक्रमण दित
करिब बाःछि लिपा इरानय् जुया वयाच्वंगु आक्रमण दिउगु दु । वंगु झिंस्वन्हु न्ह्यःनिसें बहनिसिया इलय् अमेरिकी सेनां इराकय् बहनिसिया इलय् आक्रमण याना वयाच्वंगु खः । वंगु शनिवाः बहनि धाःसा अज्याःगु छुं कथंया आक्रमण मजूगु समाचार संस्थातय्सं न्ह्यथंगु दु । आक्रमण रोके याःगु बारे थीथी संचार माध्यमं बिस्कं बिस्कं समाचार सम्प्रेषण याःगु दु ।
समाचार संस्था सीएनएनं इरानय् जुया वयाच्वंगु अमेरिकी सैन्य कारवाही रोके जूगु अमेरिकी रक्षा विभाग पेन्टागनया स्रोतयात उद्धृत यासें धाःगु दु । सीएनएनं गुलि ई वा ग्वन्हुया निंतिं आक्रमण दिउगु धइगु बारे स्रोतं स्पष्ट मयाःगु धाःगु दु ।
ओमानया प्रतिनिधिमण्डलं ‘स्टे«ट अफ होर्मुज’ हाकनं चायेकेगु निंतिं वार्ता यायेत तेहरान भ्रमण यायेत्यंगु व उगु वार्ता मस्यनेमा धइगु ल्याखं अमेरिकां इरानय् कारवाही स्थगित याःगु सीबीएस न्युजं न्ह्यथंगु दु ।
थुखे न्यूयोर्क टाइम्सं अमेरिकाया वायु रक्षा प्रणालीइ छ्यलीगु इन्टरसेप्टर क्षेप्यास्त्रया भण्डारण म्हो जुुजुं वंगु धासें राष्ट्रपति डोनाल्ड ट्रम्पं सैन्य कारवाही विस्तार यायेगु योजना स्थगित याःगु न्ह्यथंगु दु ।
इरानय् अमेरिकी आक्रमण दिउसां उखे व्यापारिक व रणनीतिक ल्याखं महत्वपूर्ण होर्मुजय् नियन्त्रणयात कयाः ब्वलनाच्वंगु विवादया कारणं मध्यपूर्वय् ब्वलनाचवंगु तनाव व जोखिम धाःसा अझं उच्च रुपं हे दयाच्वंगु दु ।
बाःछि लिपा धइथें अमेरिकी आमक्रमण दिउगुयात कयाः इरानया स्वास्थ्य मन्त्रालया प्रवक्तां ‘इरानं शान्तिपूर्ण रुपं चा छ्यात’ सामाजिक संजाल एक्सय् च्वःगु दु ।
अमेरिकी सेनाया केन्द्रीय कमान्ड सेन्टकमं नं थ्व सम्बन्धय् छुं प्रतिक्रिया बिउगु मदुनि ।
LEAVE YOUR COMMENTS