ने. सं. ११४६ दिल्लाथ्व द्वादशी -

स्पेन व फ्रान्सया जंगलय् ग्यानापुक मिं नल

स्पेन व फ्रान्सया जंगलय् वंगु न्यान्हु न्ह्यःनिसें न्यना वनाच्वंगु मिं यानाः स्वंगू लख स्वयां अप्वः मनू विस्थापित जुइत बाध्य जूगु दु । दक्षिण पश्चिम फ्रान्सय् न्यना वनाच्वंगु मि नियन्त्रणय् कायेत दमकलया कर्माचारीतय्त तसकं थाकुया च्वंगु दु ।

फ्रान्सया गिरोन्डे लान्देस क्षेत्रय् जक निगूत्या लख स्वयां अप्वः मनूतय्त सुरक्षित थासय् तये यंकेधुंकूगु दु । फ्रान्सया बोर्डो सहरपाखे मि न्यना वनाच्वंगुलिं स्थानीय प्रशासनं उच्च सतर्कता नालेत निर्देशन बिउगु दु ।

फ्रान्सया छम्ह अधिकारीं मि नियन्त्रणय् वयेत अझं आपालं ई कायेफु धासें मि नियन्त्रणय् कायेगु कुतः जुयाच्वंसां नियन्त्रणय् वइगु लक्षणपाखें गाक्कं तापाक दु धाःगु दु ।

तसकं फय् वयाच्वंगु, सुख्खा मौसम व तसकं तां न्वयाच्वंगुलिं मि नियन्त्रणय् कायेत थाकुयाच्वंगु अधिकारीतय्सं धाःगु दु । फ्रान्सेली सेनां मि नियन्त्रणय् कायेत सर्गतं रसायन त्वःताच्वंगु दु ।

थुखे स्पेन सरकारं आपतकालया घोषणा यायेधुंकूगु दु । राजधानी म्याड्रिडया जःखः च्वंपिं ख्वीद्वलं मल्याक मनूतय्त सुरक्षित थासय् यंकूगु दु । स्पेन मिं नःगु घटनाय् लानाः छम्ह सीगु दु ।

फ्रान्सया राष्ट्रपति इम्मानुएल म्याक्रों प्रभावित थासय् उद्धारया निंतिं सेना परिचालन याःगु दु । लिसें प्रभावित लागाया पुनःनिर्माण यायेगु व उकिया निंतिं सरकारं माक्व ग्वाहालि यायेगु नं धाःगु दु ।

थुखे स्पेनया प्रधानमन्त्री पेड्रो सान्चेजं वइगु ई अझं समस्या वयेफगु धासें मौसमया हे कारण मि नियन्त्रणय् कायेत तःधंगु हाथ्या जुयाच्वंगु धाःगु दु । म्याड्रिडया प्रमुखं इतिहासय् दकलय् मिं नःगु घटना धाःगु दु ।