बेलायत कोरोनाया निगूगु लहर

एजेन्सी – बेलायती प्रधानमन्त्री बोरिस जोन्सनं बेलायतय् कोरोना भाइरसया निगूगु लहर वःगु अनुभव जुयावःगु खँ धयादीगु दु । वय्कलं शुक्रवाः थ्व विषयय् सार्वजनिक जानकारी बियादीगु दु । वय्कलं आःया अवस्थाय् हे निगूगु लहर महसुस याये धुनागु व जिमित ताः आः झीसं सामाजिक दूरी कायम यायेमाःगु व भचा कडा कथंया प्रतिबन्ध तये माःगु जुइफु धयादीगु दु ।

बेलायतया स्वास्थ्य तथा सामाजिक व्यवस्था मन्त्रालयं नं थ्व विषयय् जानकारी बिउगु खः । थ्व विभागं छुं वाः दुने अवस्था तसकं नाजुक जुयावंगु खँ धाःगु दु । मन्त्रालयं म्हिगः २४ घन्टाया दुने थन ४ हजार ३२२ म्ह संक्रमित लूगु खँ धाःगु दु । थ्व ल्याः धयागु वंगु मे महिनालिपा छन्हुं हे खनेदुगु दकलय् अप्वः ल्याः खः । थ्वयां न्ह्यः बेलायतया वरिष्ठ चिकित्सक व वैज्ञानिकतय्सं प्रधानमन्त्री बोरिस जोन्सनयात थ्व दँया चिकुलाया इलय् कोरोना भाइरसया निगूगु लहर वयेफुगु खँ धयातःगु खः । चिकित्सकतय्सं भाइरसया निगूगु लहर वयेफुगुलिं थुकिया खतरा पाखें बचे जुइत आवश्यक तयारी याना च्वनेत धाःगु खः ।

तर गुलिखेसिनं चिकित्सकतय्सं सार्वजनिक याःगु प्रतिवेदन अनुमानया भरय् जूगुलिं विश्वास याये फइगु कथंया मजूगु व आः संक्रमणया लहर वःसां न्हापाया पालय् थें लिच्वः मलाकीगु खँ नं धयादीगु दु । प्रधानमन्त्री जोन्सनं धयादीगु दु, ‘थ्व अवस्थाय् तसकं खराब खः, आः निगूगु लहर नियन्त्रणया निंतिं आःया स्वयां कडा अवस्थाया प्रतिबन्ध तयेमालेफु ।’ तर वय्कलं गज्याःगु कथंया प्रतिबन्ध तयेगु धयागु बारे धाःसा छुं धयादीगु मदुनि ।

सम्बन्धित बुखँ

LEAVE YOUR COMMENTS