अफगानिस्तानया सेना प्रमुख बर्खास्त

एजेन्सी- अफगानिस्तानया सरकारं अफगान सेनाया प्रमुख वली मोहम्मद अहमदजाइयात बुधवाः बर्खास्त याःगु दु । तालिबानतय्सं अफगानिस्तानया थीथी प्रान्तीय राज्यय् कब्जा यायेवं अफगान सरकारं सेना प्रमुखयात बर्खास्त याःगु खः । अफगानिस्तानया राष्ट्रपति असरफ घानीं वली मोहम्मदयात बर्खास्त यानाः न्हूम्ह सेना प्रमुखय् हिबतुल्लाह अलिजाइयात नियुक्त याःगु दु । बर्खास्त जूम्ह वली मोहम्मद निला न्ह्यः वंगु जुनय् तिनि सेना प्रमुख जूगु खः ।

अफगानिस्तानय् दुगु ३४ गू प्रान्तीय राज्य मध्ये १० गू राज्ययात तालिबानतय्सं कब्जाय् कायेधुकूगु दु । अफगानिस्तानया निगूगु तःधंगु सहर कान्दाहारय् नं तालिबान व अफगान सेना दथुइ युद्ध जुयाच्वंगु दु । अन्तर्राष्ट्रिय रेडक्रसं बिउगु जानकारीकथं कान्दाहारया दक्षिणी क्षेत्रय् गल्ली गल्ली तक नं युद्ध जुयाच्वंगु दु । थीथी सञ्चार माध्यमं बिउगु समाचारकथं कान्दाहारया जेलं तालिबानतय्सं जेलय् दुपि सलंसः कैदीतय्त नं बिसिकूगु दु । तालिबानतय्सं जेल थःपिनिगु कब्जाय् दु धाःसां थुकिया पुष्टि धाःसा मजूनि ।

थ्वया हे दथुइ अफगान सेनायात हःपाः बिइत राष्ट्रपति असरफ घानी उत्तरी क्षेत्रय् च्वंगु मजार–ए–शरीफ सहरय् वनाः सेनाया ¥यालीइ ब्वति काःवंगु खः । अफगानिस्तानय् वंगु निदँ न्ह्यवंनिसें च्वनाच्वंपिं विदेशी सेनां अफगानिस्तान त्वःतावनाच्वंबलय् तालिबानतय्सं गांगामं निसें प्रान्तीय राजधानीइ तकं कब्जा यानाहयाच्वंगु दु । संयुक्त राष्ट्रसंघया तथ्याङ्कं कथंं थ्व लछिया दुने द्वःछिसिबें अप्वः सर्वसाधारण मनूत सीधुकूगु दु ।

 

सम्बन्धित बुखँ

LEAVE YOUR COMMENTS