सिड्नीइ लछि लिपा लकडाउन छ्वासुकीगु

एजेन्सी- अस्ट्रेलियाया तःधंगु शहर व न्यू साउथ वेल्सया राजधानी सिड्नीइ लछि लिपा लकडाउन छ्वासुकीगु जूगु दु । वंगु जुलाइनिसें कोरोना संक्रमण थहां वंगुलिं न्यू साउथ वेल्सय् लकडाउन तयातःगु खः । न्यू साउथ वेल्स राज्यया सरकारं बिहिवाः लकडाउन छ्वासुकायंकेगु योजना सार्वजनिक याःगु दु ।

न्यू साउथ वेल्सय् मेगु लछिया दुने ७० प्रतिशत मनूतय्सं कोरोनाया पूरा डोज खोप कायेधुंकीगु खँ न्यू साउथ वेल्सया प्रिमियर ग्लाडिस बेरेजिक्लियानं धाःगु दु । कोरोनाया पुरा डोज कायेधुंकूपिंत यक्व चीज यायेत छुट नं दइ । लकडाउन छ्वासुकीगु मिति धाःसा सावर्जनिक याःगु मदुनि । न्यू साउथ वेल्सया जनसंख्या मध्ये ४३ प्रतिशतं पूरा डोज व ७५ प्रतिशतं छगू डोज खोप कायेधुंकूगु दु । लछिया दुने पूरा डोज खोप काःपिं ७० प्रतिशत पुलीगु अनुमान दु । बिहिवाः न्यू साउथ वेल्सय् १४ म्ह संक्रमित खनेदुगु खः ।