म्हो जुया वनाच्वन अफागनी सेना

थीथी आक्रमणय् सैनिकत सीगु लिसें थुकिं यानाः सेना त्वःना वनीपिं अप्वया वःगुलिं अफगानी सुरक्षाफौजया जनशक्ति तसकं म्हो जुया वनाच्वुं दु । अमेरिकी सरकारया छगू संस्थां बिउगु प्रतिवेदनय् वंगु दछिया दुने यक्व हे अफगानी सैनिक म्हो जूगु खँ न्ह्यथनातःगु दु । प्रतिवेदनय् सैनिकतय् ल्याः १० प्रतिशतं म्हो जुयाः स्वंगू लाख स्वयां म्हो जूवनेधुंकूगु दु ।

तर अफगान रक्षा मन्त्रालयं धाःसा थ्व प्रतिवेदनया खण्डन याःगु दु । सरकारी प्रवक्तां उगु प्रतिवेदन तथ्यपरक मजूगु धासें लडाकु व माफिया समूहलिसे ल्वायेगु निंतिं आवश्यक सैनिक थःपिंके दुगु खँ धाःगु दु । प्रवक्तां थःपिनि सैनिकतय् मनोबल उच्च दुगु व देय्न्यंकं सैन्य कारवाही जारी दुगु खँ धाःगु दु ।

अमेरिकाया स्पेसन इन्स्पेक्टर जनरल अफ अफगानिस्तान रिकन्स्ट्रक्सन नांया संस्थां पितबिउगु प्रतिवेदनय् धाःसा सैनिकतय् म्होतिं यानाः तालिवान लिसें मेमेगु लडाकु पुचःतय् नियन्त्रणय् यक्व मनूत लाना वनाच्वंगु खँ न्ह्यथनातःगु दु ।
उगु प्रतिवेदन कथं तालिवान व मेमेगु लडाकु समूहं अफगानिस्तानया् ४०७ गू जिल्ला मध्ये आः नं १४.५ प्रतिशत क्षेत्रय् थःगु नियन्त्रण व प्रभाव लाकातःगु दु ।

थ्व ल्याः धयागु सन् २०१५या अन्त पाखे पिहांवःगु तथ्यांक स्वयां नं अप्वः खः ।संस्थाया प्रमुख जोन सोप्कों रोयटर्सलिसे खँ ल्हासें धाःगु दु– अफगान सेनाया शक्ति कमजोर जुइगु चिन्ताजनक विषय खः । अमेरिका व वया अन्तर्राष्ट्रिय साझेदारतय्सं अफगान फौजया सुदृढीकरणयात उच्च प्राथमिकताय् तयाच्वंगु दु ।

अफगानिस्तानय् तालिवानयात परास्त यायेत अमेरिकी नेतृत्वया फौजं अर्बौं डलर खर्च यायेधुंकूगु दु । अफगान सरकारं देशया फुक्क ब्वय् थःपिनि नियन्त्रण दुगु धयाच्वंगु दु । तर आःहे जक नं तालिवान व इस्लामिक स्टेट समूहं राजधानी काबुल व मेमेगु थासय् आक्रमण यानाः सयौं मनूतय् ज्यान कायेधुंकूगु दु ।

थ्व दँया सुरु पाखे बीबीसीं याःगु छगू अध्ययन कथं नं अफगानिस्तानया स्वब्व छब्व भागय् तालिवान अझं सक्रिय जुयाच्वंगु दु ।