नेदरल्यान्डय् बेलायती उडानयात प्रतिबन्ध

एजेन्सी – नेदरल्यान्डस्या सरकारं बेलायतं वइगु हवाइ उडानयात प्रतिबन्ध तःगु दु। डच सरकारं छगू विज्ञप्ति पिकासें आइतवाः निसें बेलायती उडानयात प्रतिबन्ध तयागु जानकारी बिउगु खः । बेलायतं वःगु छगू उडानय् कोरोना भाइरस संक्रमित विरामी लुइवं बेलायतं वइगु फुक्क जहाजयात प्रतिबन्ध तयाबिउगु खः। डच सरकारं वइगु जनवरी १ तकया निंतिं बेलायती उडानय् प्रतिबन्ध तःगु खः ।

डच सरकारं थःगु देशय् नं संक्रमण जुइफुगु धासें बेलायतपाखें वःपिंत नं थः नागरिकतलिसे घुलमिल याकेमबीगु कथं नीति दयेकागु खँ धाःगु दु। बेलायतय् थौंकन्हय् हाकनं कोरोना संक्रमण तच्वया वयाच्वंगु दु। बेलायत सरकारं थः नागरिकत सकसितं छेँय् हे च्वनेत धाःगु दु। क्रिसमस व न्यू इएरया इलय् भिड अप्वयेफुगुलिं नागरिकतय्त छेँय् नं पिहां मवयेत धाःगु खः ।