बलात्कारीयात प्यक्वः तक मृत्युदण्ड बीत आदेश

एजेन्सी- पाकिस्तानया छगू अदालतं खुदँ दुम्ह छम्ह मिसा मचायात बलात्कार यानाः स्याःगु द्वपनय् छम्ह मिजंयात प्यक्वःतक मृत्युदण्ड बीगु सजाय न्यंकूगु दु । लछि न्ह्यव कुरानया क्लास काःवंम्ह मचायात जैनब अन्सारी नांया उम्ह मचा गायब जूगु खः । लिपा वयात स्यानाः धलखय् वांछ्वयातःगु अवस्थाय् लुइकूगु खः ।
थ्व घटनाय् लिपा पाकिस्तानया थीथी शहरय् जूगु हिंसाय् निम्ह मनूतय् ज्यान वंगु खः ।

थ्व घटनाय् दोषी इमरान अलीयात अपरहण, बलात्कार, हत्या व आतंकवादया द्वपनय् प्यक्वःतक मृत्युदण्ड बीगु सजाय न्यंकूगु खः । इमरान नं मचा तंगु थाय् कसूरय् हे च्वंम्ह खः । प्रहरी, गुप्तचर, जाँच एजेन्सीया तःधंगु कुतः लिपा इमरानयात ज्वनेफुगु खः । थुकिया निंतिं उमिसं जैनबया छेँ नं साढे २ किलोमिटरया दायरया दुने लाःपिं सकलें २० निसें ४५ दँया सकलें मिजंतय् डिएनए जाँच याःगु खः । ११५० म्ह मिजंतय् डिएनए परिक्षण लिपा इमरानयात म्हसिकेत ताःलाःगु खः ।

मचा तंगु इलय्या छगू सिसिटिभी फुटेजय् मचा छम्ह म्हमसिउम्ह मिजंया ल्हाः ज्वनाः वनाच्वंगु खनेदुगु खः । थ्वहे आधारय् थ्व डिएनए परिक्षण याकूगु खः ।
इमरानया डिएनय् जैनबया बलात्कार मामिलाय् जक मखु, थ्वयां न्ह्यव जूगु मेमेगु बलात्कारया मामिलाय् नं मिले जूगु खँ धाःगु दु । आः थ्व मामिलाय् हाकनं मेगु सुनुवाइ जुइतिनिगु खँ सरकारी वकिलं धाःगु दु ।

सम्बन्धित बुखँ

LEAVE YOUR COMMENTS