बेल्जियमय् संक्रमित चिकित्सकतय्त नं ज्याय् वयेत इनाप

एजेन्सी – कोरोना भाइरसपाखें संक्रमित जूपिं अप्वयाः अस्पताल भर्ना जूपिं नं अप्वया वयेवं बेल्जियमया लियज सहरय् कोरोना संक्रमितत चिकित्सकतय् नं ज्या वयेत इनाप याःगु दु । थ्व शहरया थ्यंमथ्यं प्यब्वय् छब्व स्वास्थ्यकर्मीत हेकोरोना संक्रमणया कारणं विरामी जुयाच्वंगु दु । आः झिगू अस्पतालय् कोरोना संक्रमित तर लक्षण खनेमदुपिं चिकित्सकतय्त ज्या वयेत इनाप याःगु खः ।

बेल्जियमया चिकित्सक संघया प्रमुखं अस्पतालया प्रणालीयात ल्यंकातयेत संक्रमित चिकित्सकतय्त सःतेगु बाहेक मेगु विकल्प मदुगु खँ धयादीगु दु । थुकिया लिसें वय्कलं चिकित्सकपाखें हे विरामीयात भाइरस सरे जुइगु खतरा दुगु खँयात नं स्वीकार यानादीगु दु । बेल्जियमया पूर्वी शहरय् स्वम्ह मध्ये छम्हेसिके कोरोना संक्रमण खनेदयाच्वंगु दु । अस्पतालतय्सं मेमेगु ल्वय्या विरामीतय्त मेथाय् सरे यानाच्वंगु दुसा अत्यावश्यक बाहेक अप्रेशन फुक्कं बन्द यायेधुंकूगु दु । स्वास्थ्य मन्त्री फ्र्यांक भ्यान्डेनब्रुकां थ्वयां न्ह्यव हे देशय् संक्रमण बाढी वये त्यंगु धासें सचेत जुइत धायेधुंकूगु खः । थौंकन्हय् युरोप न्यंकं कोरोना भाइरस संक्रमणया न्हूगु लहर वयाच्वंगु दु ।