हंगकंगय् प्रदर्शनकारीतय्त रबरया गोली कयेकल

हंगकंगय् सुपुर्दगी सम्बन्धी छगू विवादास्पद विधेयकयात कयाः जुयाच्वंगु प्रदर्शन हिंसात्मक रुप काःगु दु । प्रदर्शन हिंसात्मक जुयावयेवं सतकय् कुहां वयाच्वंपिं प्रदर्शनकारीतय्त प्रहरीं रबरया गोली कयेकूगु दु । प्रदर्शनकारीतय्सं सरकारी भवन जःखःया मू मू सतक ठप्प यानाबिउगु दुसा प्रहरीयात नं अप्पां कयेकूगु दु ।

हंगकंगय् प्रदर्शनया झ्वलय् थथे रबरया गोली कयेकूगु दशकौं लिपा न्हापांखुसी खः । प्रहरी व प्रदर्शनकारीतय् झडपय् लानाः २२ म्ह घाःपाः जुइधुंकूगु ददु । प्रहरीं प्रदर्शनकारीतय्त तापाक हे तयातयेगु निंतिं प्लाष्टिकया बार तयाः कडा पंगः तःगु खः, तर प्रदर्शनकारीतय्त धाःसा पने फयाच्वंगु मदु ।

उमिसं प्रहरीयात न्ह्यःने लाक्व वस्तुं कयेकेगु यानाच्वंगु खँ धाःगु दु । प्रहरी कमिश्नर स्टिभन लो वाइ चुंगं थ्व घटनायात दंगा थें खनेदुगु धाःगु दु । थुकिया निंतिं दोषीयात झिदँ तक जेल सजाय जुइफइगु खँ साउथ चाइना मर्निङ्ग पोष्ट पत्रिकां च्वःगु दु । सरकारं हःगु थ्व विधेयकं हंगकंगं मू भूमि चीनय् सुपुर्दगी प्रक्रिया न्ह्याकेत अःपुकी धासें प्रदर्शन जुयाच्वंगु खः ।

थ्व विधेयक जून २० य् जुइगु अन्तिम मतदानपाखें पारित जुइगु अनुमान यानातःगु दु ।प्रदर्शन लिपा हंगकंगया विधायिका परिषदं थ्व विधेयकय् निक्वःगु सहलहयात छुं ई लिबाकूगु दु । बेइजिङ्ग समर्थक विधायिका परिषदं बुधवाः जुइ धयतःगु परिषद्या बैठक छुं ई लिपा जक जुइगु खँ धाःगु दु ।

न्हूगु विधेयकय् हत्या, बलात्कार थेंज्याःगु अपराधय् आरोपित वा संदिग्धयात मू भूमि चीन, ताइवान व मकाउपाखें सुपुर्दगीया निंतिं इनाप यायेफइगु प्रावधान तयातःगु दु । अज्याःगु इनापय् प्रत्येक घटनाय् अध्ययन लिपा सुपुर्दगीया इनापयात कयाः निर्णय याइगु खँ दुथ्याकातःगु दु ।