ने. सं. ११४६ तछलागा त्रयोदशी -

होर्मुज जलमार्ग अनिश्चितकालया निंतिं बन्द

तेहारान – इरानं होर्मुज जलमार्ग अनिश्चित कालया निंतिं बन्द याना बिउगु दु । विश्वया निंतिं व्यापारिक दृष्टिकोणं तसकं महत्वपूर्ण स्ट्रेट अफ होर्मुज जलमार्ग इरानं अनिश्तिकालया निंतिं बन्द यानागु घोषणा याःगु खः । होमुर्ज जलमार्ग बन्दया घोषणा लिपा अमेरिका व इरान दथुइ थप तनावया स्थिति ब्वलंगु दु । अमेरिकां इरान विरुद्ध न्हूगु चरणया हवाई आक्रमण याना वयाच्वंगु दुसा उखे इरानं नं अमेरिकी आक्रमणया कडा लिसः बीगु ख्याच्वः बिउगु दु ।

अमेरिकी केन्द्रीय कमान्ड सेन्टकमं साइप्रसया छगः व्यापारि क जहाजयात इरानं खुल्ला रुपं आक्रमण यायेवं अमेरिकां नं इरान विरुद्ध थुगु वालय् स्वंगूगु चरणया सैन्य कारवाही शुरु यानागु धाःगु दु । सेन्टकमं इस्लामिक रिभोलुसनरी गार्ड कोर्प्स (आईआरजीसी) या आक्रमणं साइप्रसया ध्वाँय् दुगु जहाजया इन्जिनय् गम्भिर क्षति जूगु धाःगु दु ।

जहाजया इन्जिनय् क्षति जुइवं न्ह्यःने यंकेफइगु अवस्था मदुगु व चालक दलया दुजःलिसे छम्ह नागरिक नं वेपत्ता जुयाच्वंगु अमेरिकी पक्षं दावी याःगु दु ।

थ्व हे झ्वलय् अमेरिकी रक्षामन्त्री पिट हेगसेथं ‘इरानं गलत निर्णय याःगु व आः उकिया तःधंगु मू पुले माली’ धकाः सामाजिक संजाल एकसय् सेन्टकमपाखें जारी याःगु विज्ञप्तीइ धयातःगु दु ।

थुखे आईआरजीसीं होर्मुज जलमार्ग मेगु सुचं जारी मजूतलेया निंतिं बन्द याःगु इरानी संचार माध्यमं न्ह्यथंगु दु । लिसें पूर्व स्वीकृत मार्ग त्वःताः यात्रा यानाच्वं जहाजयात तःक्वः तःक्वः ख्याच्वः बिउसां उकियात टेरे मयाःगुलिं क्रुजय् क्षेप्यास्त्र प्रहार याःगु इरानी पक्षं धाःगु दु ।

थुगु विषययात कयाः अमेरिकां गुगुं कथंया सैन्य हस्तक्षेप यात धाःसा उकिया कडा लिसः बीगु जुइ धासें होर्मुजय् दुगु न्हूगु अमेरिकी सैन्य आधारय् नं आक्रमण यायेगु ख्याच्वः इरानं बिउगु दु ।

थ्वस्वयां न्ह्यः नं अमेरिकाया सिफारिसय् ओमानया जलमार्ग जुयाः यात्रा यानाच्वंगु स्वंगः व्यापारिक चिकं ट्यांकरयात लक्षित यानाः आक्रमण याःगु खः ।