बेलायती प्रमया प्रस्ताव हाकनं अस्वीकार

लन्दन – बेलायती प्रधानमन्त्री बोरिस जोनसनया मेगु छगू प्रस्तावया अनया संसदं अस्वीकार याःगु दु । बेलायती प्रम जोनसनया बेलातय् आम निर्वाचन यायेगु सम्बन्धी प्रस्ताव अस्वीकार याःगु खः । प्रम जोनसनं निक्वःखुसी संसदय् उगु प्रस्ताव यंकूगु खःसा निक्वःखुसी नं सांसदतय्सं उकियात अस्वीकार याःगु खः ।

बेलायती प्रम जोनसनं तःगु प्रस्ताव स्वीकृत यायेत अनया क्वय्या संसदया ४३४ मत दयेमाःगु खः । तर प्रधानमन्त्रीया प्रस्तावया पक्षय् २९३ मत जक कुतुं वःगु खः । थ्व आवश्यक मत स्वयाः तसकं म्हो खः । अनया विपक्षी सांसदतय्सं थ्व स्वयां न्ह्यः नं बेलायत युरोपेली युनियनं पिहां वयेगु ब्रेक्जिट सम्झौता सम्बन्धी प्रस्तावयात नं अस्वीकार याःगु खः ।

विपक्षी सांसदतय्सं ब्रेक्जिट सम्झौता न्ह्यःने यंकेगु सम्बन्धी कानुन पारित यायेत धासें दबाव नं बिया वयाच्वंगु दु । तर प्रधानमन्त्री जोनसनं थः कानुनी प्रक्रियाकथं हे न्ह्याः वनेगु प्रतिक्रिया नं बिया वयाच्वंगु दु ।