स्वीकृति मकासे न्हूगु दरबन्दी सिर्जना याये मदइगु

येँ (नेपालभाषा टाइम्स) – सरकारी ज्याकुथिइ प्रधानमन्त्री व मन्त्रिपरिषद्या ज्याकूया स्वीकृति मकासे न्हूगु दरबन्दी सिर्जना याये मदइगु जूगु दु । म्हिगः मुख्यसचिव गोविन्दबहादुर कार्कीया अध्यक्षताय् च्वंगु बैठकं प्रधानमन्त्री व मन्त्रिपरिषद्या ज्याकूया स्वीकृति मकासे न्हूगु दरबन्दी सिर्जना याये मदइगु निर्णय याःगु खः ।

बैठक लिपा मुख्यसचिव कार्कीं ल्हाःचिं तयाः जारी याःगु २२ गू बुँदाया निर्णयय् चालु आर्थिक दँय् गुगुं नं कथंया ज्याकुथी न्हूगु दरबन्दी सिर्जना मयायेगु खँ न्ह्यथनातःगु दु । बैठकं अस्थायी पदपूर्ति मयायेगु व स्थायी पदपूर्तिया निंतिं प्रधानमन्त्री तथा मन्त्रिपरिषद्या ज्याकूया स्वीकृति मदयेक लोक सेवा आयोगपाखें माग मयायेगु निर्णय याःगु दु ।

न्हूगु संगठनलिसे व्यवस्थापन सर्वेक्षणकथं स्वीकृत जूगु दरबन्दीइ कर्मचारीतय्त आन्तरिक मिलान यायेगु, दरबन्दी म्हो जूगु अवस्थाय् अप्वःपिं कर्मचारीतय्त संघ, प्रदेश व स्थानीय तहय् खटे यानाः कर्मचारीतय्त ज्या मदयेकाः च्वनेमाःगु अवस्था वयेके मबीगु निर्णय नं बैठकं याःगु दु ।

सरकारी ज्याकुथिइ कर्मचारी सरुवा, बढुवा वा अवकाश जुइगु इलय् उम्ह कर्मचारीं सम्पादन यानाच्वंगु ज्यायात निरन्तरता बीगु निंतिं ‘संस्थागत स्मृति हस्तान्तरण’ यात नं अनिवार्य याःगु दु । थुकिं न्हू वइपिं कर्मचारीतय्त ज्या थुइकेत व कार्य सम्पादनय् अपुइगु अपेक्षा बैठकं याःगु दु ।