२५०० दँ पुलांगु ख्यें

ख्यें ग्वःन्हुतक सुरक्षित जुयाच्वनी । मनसे तयातल धाःसा निला स्वलांनिसें न्याला खुलातक । झीसं थथे विचाः याइ जुइ । तर मखु ख्यें २५०० दँ तक सुरक्षित जुयाच्वंगु खँ पत्ता लगे जूगु दु । चीनया जियाङसु प्रान्तय् पुरातत्वविद्तय्सं याःगु छगू उत्खनन्या इलय् २५०० दँ पुलांगु सीगाः (चिहानं) सद्दे ख्येँ लुइकूगु दु । उत्खननया इलय् जार थेंज्याःगु थलय् तयातःगु ख्येंमध्ये छगः हे जक तज्यानाच्वंगु अवस्थाय् लुइकूगु खः ।

प्रान्तया ‘नानजिङ म्युजियम इन्ष्टिच्यूत अफ आर्कियोलोजी’या छथ्वः अनुसन्धातातय्सं लियाङ सहरया साङसिङस्थित छगू भराय्धंगु चिहानय् उत्खन याःगु इलय् जार थें खने दुगु चाया थलय् ख्यें तयातःगु लुइकूगु खः । मनुखं ल्हातं थिइवं ख्यें तज्याःगु ग्याःचिकुया कारणं ख्यें ल्याः खायेत एक्स–रे मेशिनया प्रयोग यानागु उत्खननय् संलग्नमध्ये छम्ह पुरातत्वविद् झाओ हेङमिंगं धाःगु दु ।

‘ख्येंया तुयुगु व म्हासुगु ब्व धाःसा ध्वगिना च्वने अवस्थाय् लानाच्वंगु खः, तर उकी चि तयातःगु दु वा मदु धइगु बारे धाःसा छुं सीके मफुनि उकिं ख्येंया डीएनए परीक्षण यानाः थप जानकारी कायेगु कुतः यायेगु जुइ’ होङमिंगं धाःगु दु । ख्येंया तसकं सौखिन मनुखं उगु ख्यें तये तःगु खयेमाः धइगु अनुमान याःगु दु । लिसें उम्ह मनू मदये धुंकाः वयागु हे लुमन्तिइ थलय् ख्यें तयाः वयागु सीम्हनापं तयाः ल्हाका बिउगु खयेमाः धकाः अनुसन्धातातय्सं धाःगु दु ।

चीनया पुलांगु थज्याःगु सीगालं थुकथं ख्यें लुइकूगु घटना धाःसा थ्व न्हापांखुसी मखु । आतक गुलि नं ख्यें लुइकल उकी अप्वःथें दक्वं ख्यें तज्याःगु अवस्थाय् लुयाच्वंगु खः । अनुसन्धानय् संलग्न वैज्ञानिकतय्कथं थुलिमछिं ताःहाकःगु अवधि तक ख्येंया पिनेया भाग नं सुरक्षित रुपं दयाच्वनीगु धइगु तसकं अजू चायापुगु विषय खः । सन् २०१५ य् नं २००० दँ पुलांगु ख्यें लुइकूगु खः ।

 

सम्बन्धित बुखँ

LEAVE YOUR COMMENTS