ने. सं. ११४६ बछलाथ्व पञ्चमी - दयावीरसिं बुदिं

जोनसनया मन्त्रिमण्डलय् बेक्जिटया पक्षधरत

नवनियुक्त प्रधानमन्त्री बोरिस जोनसनं युरोपेली संघं बेलायत पिहां वयेमाः धयागु अभियान न्ह्याकूपिं अप्वः धयाथें नेतातय्त थःगु मन्त्रिमण्डलय् मू मू जिम्मेवारी बिउगु दु । जोनसनया मन्त्रिमण्डलय् एसिया मूलया निम्ह बेलायती नागरिकत नं लाःगु दु । जोनसनया मन्त्रिमन्डलय् डोमिनिक रब विदेश व प्रिति पटेल गृहमन्त्रीया रुपय् सरकारय् लिहां वःगु दु ।

अथेहे टेरिजा मेया सरकारया इलय् गृहमन्त्री जुयाच्वंगु साजिद जावेदयात अर्थ मन्त्रालयया जिम्मेवारी बिउगु दु । अथे खःसां मेया मन्त्रिमण्डलया बछि स्वयां अप्वः दुजःतय्सं कि त राजीनामा बिउगु दु कि त चिइकूगु दु । थुकी जोनसनलिसे प्रधानमन्त्री पदया निंतिं प्रतिस्पर्धा याःम्ह जेरमी हन्ट नं लाःगु दु ।

थ्वयां न्ह्यः जोनसनं बेक्जिट ‘भाग्यवादी व निराशावादी’ धयागु धापू गलत जूगु व वइगु अक्टोवर ३१ तारिख दुने बेलायतं युरोपेली संघ त्वःती धयादीगु खः । प्रधानमन्त्री निवासी टेन डाउनिङ स्ट्रिटय् न्ववानादिसें वय्कलं ‘यदि व तर’ थेंज्याःगु खँ मल्हासें तोके यानातःगु इलय् हे बेलायत युरोपेली संघपाखें पिहां वइगु दावी यानादीगु खः ।

प्रधानमन्त्री जोनसनं पदय् वयेवं न्हापाया सरकारय् दुपिं झिंन्हय्म्ह वरिष्ठ मन्त्रीतय्त चिइकेगु वा राजीनामा बीत बाध्य याःगु खः । जोनसन लिसे दलया नेताया निंतिं प्रतिस्पर्धा याःम्ह विदेशमन्त्री जेरमी हन्टं थःत मेगु हे मन्त्रालय बीत्यंगु, तर थःम्हं अस्वीकार यानागु खँ धाःगु दु ।

संघपाखें बेलायत पिहां वयेमाः धकाः वकालत यायेगुली मू नेतृत्वया भूमिका म्हिताच्वंम्ह व पार्टीया छम्ह लोकंह्वाःम्ह नेतृ जुयाच्वंम्ह रक्षामन्त्री पेनी मोर्डन्टयात नं अजूचायापुक मन्त्रिमण्डलं चिइकुगु दु । वयागु थासय् पुलांम्ह सैनिक व ताःई न्ह्यव निसें जोनसनयात साथ बिया वयाच्वंमह बेन वालेसयात हःगु दु ।

युरापेली संघपाखें बेलायत पिहां वयेमाः धकाः वकालत याना वयाच्वंम्ह मेम्ह अन्तर्राष्ट्रिय व्यापार मन्त्री लाइम फक्स व व्यापामन्त्री ग्रेग क्लार्क नं मन्त्रिमण्डलं पिने लाःगु दु । क्लार्क छुं सम्झौता मयासे युरोपेली संघ त्वःतेगु धयागु प्रस्तावयात खुल्ला रुपं विरोध याना वयाच्वंम्ह मनू खः ।