उत्तर कोरियां वइगु महिनाय् परमाणु परीक्षण केन्द्र बन्द याइगु

उत्तर कोरियां थःगु पारमाणविक परीक्षण केन्द्र वइगु मे महिनाय् बन्द याइगु खँ दक्षिण कोरियाली राष्ट्रपतिया ज्याकुथिं धाःगु दु । राष्ट्रपतिया ज्याकूया छम्ह प्रवक्तां छगू सार्वजनिक ज्याझ्वः यानाः हे परीक्षण केन्द्र बन्द याइगु व बन्द जूगु स्वयेत दक्षिण कोरिया व अमेरिकी विज्ञतय्त सःतीगु खँ नं धाःगु दु ।

वंगु शुक्रवाः उत्तर कोरियाली नेता किम जङ अन व दक्षिण कोरियाली राष्ट्रपति मून जे इनं कोरियाली प्रायद्वीपय् परमाणविक अस्त्रमुक्त यायेत व सन् १९५३ य् जूगु युद्धविरामं दिनाच्वंगु निगू कोरिया दथुया युद्ध औपचारिक रुपं क्वचायेकेगु सहमति याःगु खः । उगु बैठकय् हे उत्तर कोरियाली नेता किमं वइगु मे महिनाय् पारमाणविक परीक्षण केन्द्र बन्द यायेगु खँ धाःगु जानकारी राष्ट्रपति मूनया प्रवक्तां पत्रकारतय्त जानकारी बिउगु खः ।

थ्वयां न्ह्यः मिसिगनय् जूगु छगू ¥यालीइ न्ववासें अमेरिकी राष्ट्रपति डोनाल्ड ट्रम्पं स्ववाः व प्यवाः दुने कोरियाली प्रायद्वीपया निशस्त्रीकरणबारे उत्तर कोरियाली नेतालिसें थःम्हं वार्ता यायेगु खँ धयादीगु खः । निगू कोरियाली नेतातय् वार्ता लिपा ट्रम्पं दक्षिण कोरियाली राष्ट्रपति मून लिसे खँल्हाबल्हा यानादीगु धुंकूगु दु ।