नीगू दकलय् प्रदूषित सहरय् झिंप्यंगू भारतया

विश्व स्वास्थ्य संगठनं विश्वया दकलय् प्रदूषित नीगू शहर मध्ये झिंप्यंगू ला भारतया हे जक लाःगु खँ धाःगु दु । विश्व स्वास्थ्य संगठनया अध्ययनयात कयाः बिबिसी यानास्वःगु विश्लेषणय् सन् २०१६ य् भारतया उत्तरी शहर कानपुरया फसय् पीएम २.५ धाइगु अतिसुक्ष्म कण दकलय् अप्वः खनेदुगु खः ।

थ्व तसकं घातक कण खः, थुकिं सासः, नुगःचु व हिनूसम्बन्धी ल्वय् ब्वलंकीगु सम्भावना अप्वः दइ । तसकं प्रदूषित सहरया धलखय् राजधानी दिल्ली लिसें बनारस, पटना, लखनउ, आगरा व श्रीनगर नं लाःगु दु । विश्व स्वास्थ्य संगठनया प्रतिवेदनय् सन् २०१६ य् जक वायु प्रदूषणया कारणं विश्वन्यंकं ४२ लाख मनूत सीगु खँ न्ह्यथनातःगु दु ।

उगु हे दँय् कानपुरय् पीएम २.५या औसत स्तर १७३ थ्यंगु खः, गुगु विश्व स्वास्थ्य संगठन तय यानातःगु सुरक्षित सीमा स्वयां १७ गुणां अप्वः खः ।राजधानी दिल्ली धाःसा विश्वया खुगूगु दकलय् प्रदूषित सहर जूगु दु । अन औसन पीएम २.५ या परिमाण १४३ मापन याःगु खः ।

अध्ययन कथं विश्वया झिम्ह मनू मध्ये गुम्हेसिनं प्रदूषित फसय् सासः ल्हाये मालाच्वंगु दु । प्रदूषण याइगु इन्धन व प्रविधिं नसाज्वलं दयेकीबलय् वइगु प्रदूषणं जक सन् २०१६ य् करिब ३८ लाख मनूत सीगु अध्ययनय् न्ह्यथनातःगु दु । विश्व स्वास्थ्य संगठनं अझ नं मिसा व मस्त लिसें स्वंगू अर्ब मनूत छेँय् प्रदूषण याइगु स्टोभ व इन्धन छ्यलाः घातक कुँ नयेत बाध्य जुयाच्वंगु खँ धाःगु दु ।