दिल्लीइ जोरविजोर प्रणाली

भारतया राजधानी न्हू दिल्लीइ सोमवाः निसें सवारी साधन चले यायेत जोर विजोर प्रणाली लागू याःगु दु । दिल्ली न्यनाच्वंगु तच्वःगु प्रदूषणया कारणं थ्व जोर विजोर प्रणाली लागू याःगु खः । सवारी साधनं पिहां वइगु कुं यानाः प्रदूषण अप्वयेकाच्वंगु धासें दिल्ली सरकारं थ्व निर्णय याःगु खः ।

दिल्लीया मुख्यमन्त्री अरबिन्द केजरीवालं वातावरण प्रदूषण पनेगु निंतिं सरकारं यानाच्वंगु कुतलय् ग्वाहालि यायेत सकल नागरिकतय्त इनाप यानादीगु खः । दिल्लीइ छुं ई न्ह्यवनिसें तसकं वायु प्रदूषण अप्वयाच्वंगु दु । प्रदूषण अप्वःगुलिं दिल्ली सरकारं ५० लाख मास्क इनाच्वंगु दुसा मंगलवाः तक फुक्क स्कुल बन्द याकेधुंकूगु दु ।

मुख्यमन्त्री केजरीवालं राजधानीइ प्रदूषण अप्वःगुलिं थुकी योगदान बीत निजी सवारी साधन (कार) छ्यलीपिंसं ‘कारपुलिङ्ग’ यायेत इनाप यानादीगु दु । वय्कलं थःगु व थः मस्तय् स्वास्थ्यया निंतिं नियम पालना यायेत धयादीगु दु । मेखे जोरविजोर प्रणालीयात धाःसा केन्द्र सरकारय् नेतृत्व यानाच्वंगु भारतीय जनता पार्टी व प्रतिपक्षी दल भारतीय राष्ट्रिय कांग्रेसं धाःसा विरोध याःगु दु ।

सम्बन्धित बुखँ

LEAVE YOUR COMMENTS