सउदी पत्रकार हत्याकाण्ड

अमेरिका व बेलायत रियाल सम्मेलनय् मवनीगु सम्भावना

साउदी पत्रकार जमान खशोग्गीयात बेपत्ता लिपा हत्या याःगु घटनां तम्वया च्वंगु अमेरिका व बेलायतं साउदी अरेबियाय् जुइत्यंगु छगू सम्मेलन बहिष्कार यायेफुगु खँ धाःगु दु । टर्कियाइस्तानबुलय् च्वंगु साउदी वाणिजय दूतावासय् वंगु अक्टोवर २ तारिखय् थ्यंम्ह पत्रकार खशोग्गी उकुन्हु निसें बेपत्ता जुयाच्वंगु दु ।

सउदी अरेबियाया राजकुमार मोहम्मद बिम सलमानया नीतियात कयाः कडा आलोचना यानाच्वंम्ह खशोग्गीयात साउदी सरकारं हे बेपत्ता याःगु द्वपं अन्तर्राष्ट्रिय समुदायं बिया वयाच्वंगु दु । टर्किया अधिकारीतय्सं सउदी अरेबियां हे खशोग्गीया हत्या याकूगु खँ धायेगु यानाच्वंगु दु ।

अमेरिकी राष्ट्रपति डोनाल्ड ट्रम्पं साउदी अरेबियां खशोग्गीया हत्या याःगु पुष्टि जुल धाःसा साउदीयात दण्ड बीगु खँ धाःगु दु । थ्व हे घटनायात कयाः गुलिखे प्रायोजक व संचार समुहं थ्व हे महिनाय् रियादय् जुइत्यंगु लगानी सम्मेलन बहिष्कार यायेगु क्वःछिइ धुंकूगु दु । आः अमेरिकी अर्थमन्त्री व अन्तर्राष्ट्रिय व्यापार सम्बन्धी बेलायती मन्त्री नं थ्व सम्मेलनय् मवनेफुगु खँ पिहां वःगु खः ।