तालिबान सरकार गठनं अमेरिकायात चिन्ता, चीनया समर्थन

तालिबान सरकार प्रमुख मुल्लाह मोहम्मद हसन अखुन्द

एजेन्सी- अफगानिस्तानय् तालिबानं याःगु सरकार गठन लिपा अमेरिकां चिन्ता प्वंकूगु दु । तालिबानं मंगलवाः सरकार गठनया घोषणा याःगु खःसा तालिबान सरकारय् दुपिं दक्वः दुजःत अमेरिकी सेनायात आक्रमण याःपिं लानाच्वंगुलिं अमेरिकां चिन्तित जूगु खः । अथे हे तालिबानं गठन याःगु सरकारय् मिसापिं छम्ह नं मदुगु खँय् नं थःपिनिगु ध्यान वंगु अमेरिकां धाःगु दु । तालिबानं अफगानिस्तानयात कब्जाय् काःगुयां स्ववाः लिपा सरकार गठनया घोषणा याःगु खः ।

अमेरिकाया विदेश मन्त्रालयं विज्ञप्ति पिकयाः अफगानिस्तानय् ब्वलनाच्वंगु घटनाक्रमयात अमेरिकां क्वथीक स्वयाच्वंगु धयातःगु दु । विज्ञप्तिइ खराब इतिहास दुपिं मनूत सरकारय् वंगुलिं अमेरिका चिन्तिति जूगु नं धयातःगु दु । विज्ञप्तिइ अमेरिकां तालिबानया खँ न्यनाः मखु, ज्या स्वयाः तालिबानया मूल्यांकन यायेगु नं धयातःगु दु ।

तालिबानं अफगान भूमियात मेगु देय्यात खतरा जुइगु ज्याय् छ्ययेके मबिइगु अपेक्षा नं तालिबानपाखें यानागु धयातःगु दु । अथे हे अमेरिकी वरिष्ठ सांसद लिन्डसे ग्राहमं तालिबानं गठन याःगु सरकारयात ठग व कसाइतय्गु पुचः धाःगु दु । रिपब्लिकन सांसद लिन्डसे अमेरिकी राष्ट्रपति जो बाइडेनया आलोचक खः ।

तालिबान सरकारया नेतृत्व मुल्लाह मोहम्मद हसन अखुन्दं याःगु दु । हक्कानी नेटवर्क नांयागु चरमपन्थी पुचःया प्रमुख सराजुद्दिन हक्कानीयात गृहमन्त्री दयेकूगु दु । हक्कानी नेटवर्कयात अमेरिकां आतंकवादी पुचलय् तयातःगु दुसा सराजुद्दिन हक्कानीयात अमेरिकाया एफबीआर्इं वान्टेडया धलखय् तयातःगु दु ।

थ्वया हे दथुइ अफगानिस्तानया हेरात प्रान्तय् तालिबानविरुद्ध जूगु प्रदर्शनय् तालिबान लडाकुं कयेकूगु गोलीं लानाः स्वम्ह मनू सीगु दु । काबुलय् नं तालिबान विरुद्ध प्रदर्शन जूगु दु ।
मेखे तालिबान सरकारयात चीनं समर्थन याःगु दु । चीनं अफगानिस्तानय् गठन जूगु न्हूगु सरकारलिसे बांलाःगु स्वापू तयेगु धाःगु दु । बुधवाः चीनया विदेश मन्त्रालयया प्रवक्ता वाङ वेनबिनं चीनं आफगानिस्तानया सार्वभौसत्ता, स्वतन्त्रता व क्षेत्रीय एकरुपतायात सम्मान यायेगु धाःगु दु । प्रवक्ता वाङं तालिबानं दक्वसिगु खँ न्यंगु व अन्तर्राष्ट्रिय चाहानायात पुरा याःगु नं धाःगु दु ।

सम्बन्धित बुखँ

LEAVE YOUR COMMENTS