भारतया चन्द्रयान प्रक्षेपण

भारतं चन्द्रमाय् वनीगु यान म्हिगः प्रक्षेपण याःगु दु । म्हिगः सोमवाः न्हिनय् स्थानीय ई कथं २ः४३ श्रीहरिकोटाय् च्वंगु सतिश धवन स्पेस सेन्टरं चन्द्रयान–२ प्रक्षेपण याःगु खः । भारतयाके दुगु दकलय् शक्तिशाली रकेट जिएसएलभी एमके ३ लय् चन्द्रयानयात तयाछ्वःगु खः । रकेट प्रक्षेपण याःगु १६.२३ मिनेट लिपा चन्द्रयान २ रकेटं छुटे जुयाः पृथ्वी कक्षय् परिक्रमा सुरु याःगु खः ।

थ्व यान वइगु अगस्ट २३ तक पृथ्वीया परिक्रमा यायेधुंकाः चन्द्रमापाखे न्ह्याः वनी । १९ अगस्टय् चन्द्रमाया कक्षय् थ्यनीसा थुकिया झिंस्वन्हु लिपा ३१ अगस्ट कुन्हु थ्व यानं चन्द्रमाया प्यखेरं परिक्रमा सुरु याइ । थ्वयां कन्हय् कुन्हु सेप्टेम्बर १य् ल्यान्डर अर्बिटरपाखें अलग जुयाः चन्द्रमाया दक्षिणी धु्रवपाखे वनी ।

थ्वयां न्यान्हु लिपा ६ सेप्टेम्बर कुन्हु विक्रम नां बियातःगु थ्व ल्यान्डर चन्द्रमाया धरातलय् अवतरण याइ । चन्द्रमाया दक्षिणी धु्रवय् वंगु थ्व विश्वया हे न्हापांगु चन्द्र मिसन खः । थ्व यानं चन्द्रमाया धरातय् लःया मोलेकुल डिस्ट्रिब्युसन बारे थप अध्ययन याइसा धरातलया म्यापिङ्ग, मिनरल व केमिकलया बारे नं अध्ययन याइ ।

भारतय् हे विकसित याःगु प्रविधिया ग्वाहालिं चन्द्रमाया धरातलय् ल्यान्ड यायेगु भारतया थ्व न्हापांगु कुतः खः । यदि थ्व यानं चन्द्रमाया धलातलय् ल्यान्ड यायेत सफल जुल धाःसा थथे यायेत ताःलाःगु भारत प्यंगूगु देय् जुइ । भारतं थ्व अभियानया निंतिं ९ अर्ब ७८ करोड भारु खर्च याःगु दु ।

भारतं छवाः न्ह्यव हे थ्व यान प्रक्षेपण यायेगु धाःगु खःसां अबलय् प्रक्षेपण याये घौछिति न्ह्यव यान ज्वनावनीगु रकेटं समस्या दुगु धासें स्थगित याःगु खः ।

सम्बन्धित बुखँ

LEAVE YOUR COMMENTS