इरानय् हाकनं मेम्ह मन्त्री चिइकल

तेहरान – इरानय् न्ह्यानाच्वंगु आर्थिक संकटया दथुइ हाकनं मेम्ह मन्त्रीयात पदं चिइकूगु दु । देय्या आर्थिक संकटया दथुइ अनया संसदं वित्तमन्त्री मसुद कर्बासियायात पदं चिइकूगु खः । वंगु बाःछिया दुने इरानय् मन्त्रीयात पदं चिइकूगु थ्व निगूगु घटना खः । थ्व स्वयां न्ह्यः वंगु अगस्ट ८ तारिख कुन्हु देय्या श्रममन्त्री अली रबेइयात पदं चिइकूगु खः ।

वित्तमन्त्री मसुद विरुद्ध अनया संसदय् अविश्वासया प्रस्ताव दर्ता याःगु खः । गुकी मसुदं पराजयया सामना यायेमाल । वयागु पक्षय् २१ मत कुतुं वंगु खःसा विपक्षय् १३७ मत कुतुं वंगु खः । इरानय् तच्वया वनाच्वंगु आर्थिक संकटयात कयाः राष्ट्रपति हसन रुहानीं देशय् खना दयाच्वंगु महँगी व इरानी मुदं्रा रियलया अवमूल्ययात नियन्त्रयाय् कायेत जुयाच्वंगु संघर्ष जारी दुगु खँ धाःगु दु ।

थ्व इलय् वयाः इरानया राष्ट्रपति रुहानीं देय्या कट्टरपन्थी जक मखसे सुधारवादी पक्षया नं कडा आलोचना फयेमालच्वंगु दु । इरानय् खने दयाच्वंगु आर्थिक संकटया कारण अमेरिकी प्रतिबन्ध खः धकाः नं धायेगु याना हया च्वंगु दु ।

वंगु मई महिनाय् अमेरिकां इरानयात हाकनं प्रतिबन्धया घोषणा याःगु खः । सन् २०१५ य् तयातःगु प्रतिबन्ध चिइके धुंकाः अमेरिकां हाकनं प्रतिबन्धया घोषणा याःगु खःसा थुगु घोषणा लिपा इरानय् आर्थिक संकट तच्वया वंगु खः ।