भारतया विवादास्पद कृषि कानुन खारेज यात
एजेन्सी- भारतया प्रधानमन्त्री नरेन्द्र मोदीं दछि न्ह्यवंनिसें किसानतय्सं विरोध यानावयाच्वंगु स्वंगू विवादास्पद कानुन खारेजया घोषणा याःगु दु । शुक्रवाः सुथय् राष्ट्रया नामय् सम्बोधन यासें प्रधानमन्त्री मोदीं कानुन खारेज जूगु घोषणा याःगु खः ।
प्रधानमन्त्री मोदीं स्वंगुलिं कानुन लित कयागु व थ्व हे महिनाया अन्तय् जुइगु संसद सत्रय् स्वंगुलिं कृषि कानुन रद्द यायेत संवैधानिक प्रक्रिया पुरा यायेगु नं धाःगु दु । मोदीं किसानया फाइदाया निंतिं हे कानुन हयागु तर किसानतय्त थःपिंसं थुइके मफुगु नं धाःगु खः । किसान संगठनतय्सं थ्व घोषणयात थःपिनिगु विजय धकाः धाःगु दु ।
दछि न्ह्यवंनिसें विवादास्पद कानुनया विरोध यानाः द्वलंद्वः किसानतय्सं राजधानी दिल्लीया सिमानाय् धर्ना बियाच्वंगु खः । किसानतय्स कानुनं यानाः कृषिइ निजी क्षेत्रया बर्चस्व जुइगु व किसानतय्गु आम्दानीइ असर लाकीगु व थपिनिगु उत्पादनया न्यूनतम मूल्य नं मवइगु धासें विरोध यानावयाच्वंगु खः ।
भारतया मन्त्रीतय्सं धाःसा कानुन किसानया निंतिं फाइदा जुइगु दाबी याना वयाच्वंगु खः । किसान व सरकारया दथुइ तःक्वः हे वार्ता जूगु खःसां वार्ता असफल जुयाच्वंगु खः । आन्दोनलया नेता राकेश टिकैतं कानुन कथं संसदीय प्रक्रिया पूमवंतले आन्दोलन न्ह्याना हे च्वनीगु नेता टिकैतं धाःगु दु ।
कानुन लित कायेधुकाः काँग्रेसया नेता राहुल गान्धीं किसानतय्त बधाई बिउगु दु । अथे हे पश्चिम बंगालया मुख्यमन्त्री ममता बनर्जी व दिल्लीया मुख्यमन्त्री अरविन्द केजरीवालं नं किसानतय्त बधाई बिसें लसता प्वंकूगु दु ।
कानुन लित कायेगु खँय् टसमस हे मजुयाच्वंगु मोदी सरकारं उत्तर प्रदेश व पन्जाबय् जुइत्यंगु विधानसभाया चुनाव न्ह्यः थथे कानुन लित कायेगु घोषणा याःगु धाःसा अर्थपूर्ण खनेदुगु विश्लेषकतय्सं धाःगु दु ।
LEAVE YOUR COMMENTS