डिप्लोमा पास खिचा

मूलतः शिक्षा मनूया निंतिं खः । शिक्षां मनूया चेतना विकासय् भूमिका म्हिती । मनू बाहेकं थ्व संसारय् मेपिं अज्याःपिं सुं नं प्राणी मदु, गुम्हेसिनं शिक्षा काइ अथवाः शिक्षाया आवश्यक जू । मनूलिसे अतिकं सतीम्ह जनावरकथं कयातःपिंसं तकं मनूया भूमिका म्हिते फइमखु । अर्थात इमित नं शिक्षाया आवश्यक मजू ।

तर अमेरिकाया न्यूयोर्क शहरया छम्ह खिचां डिप्लोमा पास याःगु दु । उलिजक गन खः, धकाः डिप्लोमा पास जूगु शैक्षिक प्रमाण पत्र तकं दु, व खिचायाके । न्यूयोर्कया क्लार्कसन विश्वविद्यालयय् अध्ययनरत २५ दँ दुम्ह मिसा ब्रिटनी होलें छुं ई न्ह्यः जक ‘अक्युपेशनल थेरापी’या मास्टर डिग्री हासिल याःगु खः ।

शारीरिक रुपं अशक्त होलेया नापनापं वया ग्रिफेन नांया खिचायात नं विश्वविद्यालयं डिप्लोमा उपाधि बिउगु खः ।ब्रिटनी शारीरिक रुप अशक्त जूगुलिं ह्विलचेयरय् थःगु जीवन हनाच्वंम्ह खः । थः खिचा गिफ्रेनया बारे ब्रिटनीया धापू दु, ‘जिं न्हापांगु दिंकुन्हुनिसें हे ग्रिफेनयात ग्राजुयट जुइत धासें प्रोत्साहित याना वयाच्वनागु खः, उकिं जिं छु यात वं नं अथे हे याना वयाच्वंगु खः ।’

शारीरिक रुपं यायेमाःगु सकतां ज्या छम्ह हृष्टपुष्टम्ह ल्याय्म्हं थें फुर्ति यानाः याइम्ह ग्रिफेनया बारे ब्रिटनीं धाःगु दु, ‘सकतां ज्या फुर्ति साथ याइम्ह ग्रिफेनं लुखा चायेकेगु, मत च्याकेगु, स्यायेगु, सामान उखे थुखे थासय् तयेगु दक्वं ज्या यायेफु । सकतां ज्या इशाराय् याःगु भरय् याइम्ह ग्रिफेन दक्वं ज्या यायेत उलि हे सक्षम जू ।

दकलय् महत्वपूर्ण खँ ला थ्व दु कि, ग्रिफेनया ग्वाहालिया हे कारणं ब्रिटनीयात थःगु त्यानगु, वाक्क दिक्क चाइगु, डिप्रेशन, आलस्यता सकतां तंकेत सफल जुयाच्वंगु दु । ब्रिटनी व ग्रिफेनया बारे मेगु छता खँ छु धाःसा इमिसं उत्तरी क्यारोलाइटया फोर्ट ब्रेगय् इन्टर्नशीप नं यायेधुकूगु दु ।

 

 

सम्बन्धित बुखँ

LEAVE YOUR COMMENTS