फेसबुकं समता कर लितकाःगु खँय् प्रधानमन्त्रीया आलोचना
येँ (नेपालभाषा टाइम्स) – प्रधानमन्त्री बालेन साहं समता कर सामाजिक सञ्जाल फेसबुकपाखे लित काःगु खँयात कयाः सामाजिक सञ्जालय् आलोचना जुयाच्वंगु दु । वरिष्ठ कार्टुनिष्ट रविन साय्मिं सामाजिक सञ्जाल फेसबुकय् च्वयादी, ‘राजपत्र स्वयां फेसबुक आधिकारिक जुयाच्वंगु दु ।’
थुकथं प्रधानमन्त्री साहं फेसबुकपाखे समता कर लित कयागु घोषणायात कयाः थीथी कथंया न्ह्यसः थनेगु ज्या नं जुयाच्वंगु दु । संसदं पारित याःगु समता कर पूर्ण रुपं छुट बीगु निर्णय सरकारं बुधवाः याःगु दु । बुधवाः च्वंगु मन्त्रिपरिषदया बैठकं उगु निर्णय याःगु जानकारी सरकारया प्रवक्ता लिसे शिक्षा मन्त्री सस्मित पोखरेलं बियादीगु दु ।
उकथं हे संसद पारित याःगु कानुन सरकारं ययेवं हिले मफइगु व्यवस्था दु । अथेजुयाः कानुन रुपय् वयेधुंकूगु शिक्षा समता व स्वास्थ्य समत शुल्क प्रधानमन्त्रीं घोषणा यायेगु गुकथं खारेज जुइ धइगु न्ह्यसः नं सामाजिक सञ्जालय् वयाच्वंगु दु ।
सरकारया उगु घोषणायात कयाः नेपालभाषाया कवियित्री रजनी मिलां च्वयादी, ‘बालेनया एकतन्त्रीय शासन फेसबुकं न्ह्यानाच्वंगु दु । समता कर कार्यान्वयन मयायेगु उद्घोष फेसबुकं जूगु खनि भुन्ट !’ उकथं हे वय्कलं च्वयादी, ‘राजपत्र सुनां स्वइ ? करोडौं डलर वइ ? थ्वहे खः मौका !’
अथे हे उज्यालो नेपालया नेता रामेश्वर श्रेष्ठ प्रधानमन्त्री साहं समता शुल्क लित कायेधुंकाः अर्थमन्त्री नैतिकताया आधारय् राजीनामा बीगु कि ! प्रधानमन्त्री निष्कासन ?’ यायेगु धकाः न्ह्यसः तयादीगु दु ।
रविन्द्र कुमार श्रेष्ठं सामाजिक सञ्जाल फेसबुकय् च्वयादीगपु दु, ‘म्हिगः तक सरकार दुने खटपट मजु, अथेजुयाः ३ प्रतिशत शिक्षा व स्वास्थ्य समता शुल्क ‘पाय्छि’ खः । थौं सरकार दुने मतभेद खनेदयेवं उगु हे शुल्क आकाझाकां ‘पाय्छि मजूगु’ जुल । थुकिं न्ह्यसः थनी नीति जनहितया आधारय् दयेकी कि सरकार दुनेया शक्ति सन्तुलनया आधारय् ? यदि थुगु शुल्क न्हापांनिसें गलत खःसा छाय् लागूयात ? व सहि खःसा आन्तरिक खटपटया कारण छाय् लिति काल ?’
अभियन्ता दिवेश साय्मि च्वयादी, ‘संसदं निर्णय यायेगु ! फेसबुकं भिंकेगु कर थम्हं हे लगे यायेगु थम्हं हे चीकेगु ? अझ तःधंगु हे ज्या याना थें ? कर लगे यायेगु इलय् मसिउगु ला ? जनतायात मार लाइ धकाः गुलि मिडिया ट्रायल ?’
सरकारं स्वास्थ्यय् समता शुल्क चीकेगु घोषणा याःसां नं थीथी निजी अस्पतालतय्सं धाःसा अझ नं समता शुल्क कयाच्वंगु खँ सीदुगु दु । अस्पताल वंपिं विरामीतय्सं स्वास्थ्यय् समता कर पुलाच्वंगु खँ धाःगु दु ।
निजी अस्पतालतय्सं बिरामीतय्त सरकारपाखे लिखित रुपय् प्रशासनं पौ मवःगु धासें ३ प्रतिशत कर कायेमाःगु खँ धाःगु दु । येँया आपालं धयाथें अस्पतालं ३ प्रतिशत शुल्क कयाच्वंगु खँ सीदुगु दु ।
LEAVE YOUR COMMENTS