रिया चक्रवर्तीयात जमानत बिल

एजेन्सी – बलिउड अभिनेता सुशान्त सिंह राजपूतया आत्महत्या मामिलाय् वया गर्लफ्रेन्ड धयातःम्ह रिया चक्रवर्तीयात बम्बइ हाइकोर्टं बुधवाः जमानत बिउगु दु। तर रियाया किजा सौविक चक्रवर्तीया जमानतया याचिका धाःसा खारेज याःगु दु ।

सुशान्तया आत्महत्या लिपा अनुसन्धान यानाच्वंपिं सिआईबी रिया व वया किजाया लागू वासः छ्यलाबुलाय् संलग्नता दुगु लुइकेवं नार्कोटिक्स विभागपाखें उमित ज्वंगु खः । अदालतं रियायात छगू लाखतकाया ग्यारेन्टीइ जमानत बिउगु खः । थ्वयां छन्हु न्ह्यव जक छगू विशेष अदालतं धाःसा नार्कोटिक्स एन्ड साइक्रोट्रोसिपक सब्स्टेन्ट एक्ट कथं रियायात २० अक्टोवर तक न्यायिक हिरासतय् तयेत अनुमति बिउगु खः ।

बम्बइ हाइकोर्टं जमानत बीगु झ्वलय् रियायात मुम्बई नं पिहां वनेमाः अनुसन्धान अधिकारीयात जानकारी जक बियाः वनेमाःगु व वयागु पासपोर्ट नं जफत यायेगु आदेश बिउगु खः । रिया आः अदालतया अनुमति मदयेकं देशं पिहां वनेदइमखु। रियाया लिसें सुशान्त सिंहया छेँय् ज्या याइपिं स्यामुअल मिरांडा व दीपेश सांवतयात नं जमानत बिउगु दु ।

छुं न्हि न्ह्यव जक सुशान्तया अप्टोसी परीक्षण यायेत दयेकूगु एम्स अस्पतालया समितिं सुशान्तया म्हय् विष मदुगु व वं आत्महत्या हे याःगु रिपोर्ट सिबीआईयात बिउगु खः ।