एशियाली पूर्वाधार बैंकय् सछिगू देय् दुजः

एशियाली पूर्वाधार लगानी बैंक (एआइआइबी)या सदस्यतय् ल्याः सछि थ्यंगु दु । चिनिया पहलय् सन् २०१६ य् थ्व बैंक नीस्वंगु खः । थ्व बैंकया संस्थापक दुजः मध्ये नेपाः नं छगू खः । स्वंगू अफ्रिकी देय्त बेनिन, जिबुटी व रुवान्डां सदस्यता कायेवं थ्व बैंकया दुजःतय् ल्याः सछि थ्यंगु खः ।

लक्जेम्बर्गय् जूगु बोर्ड अफ गभर्नरया प्यक्वःगु वार्षिक बैठकं थ्व स्वंगू देय्यात नं दुजः दयेकेगु घोषणा याःगु खः । थुपिं देय्तय्सं बैंकया पुँजी लगानी रकमया न्हापांगु किस्ता बुझे यायेवं औपचारिक बी । प्यक्वःगु बोर्ड बैठकं चीनया अर्थमन्त्री लिऊ कुनयात बोर्डया अध्यक्षय् निर्वाचित याःगु दु ।

अध्यक्ष कुनं बैंकया लगानी आः च्यागू अर्ब ५० करोड अमेरिकी डलर थ्यनेधुंकूगु खँ धयादिसें थुकिं बहुपक्षीय विकास प्रणालीया महत्वपूर्ण अंग कथं बैंकयात स्थापित याःगु खँ धयादीगु दु ।

पूर्वाधार निर्माण पाखें दिगो विकासय् ग्वाहालि यायेगु ताः तयाः नीस्वंगु थ्व बैंकं स्वदँया दुने याःगु ज्यायात च्वछासें संयुक्त राष्ट्र संघया महासभां नं बैंकयात पर्यवेक्षकया मान्यता बिउगु खँ नं वय्कलं धयादीगु दु । थ्व बैंकं आः विश्वया कुल जनसंख्याया ७८ प्रतिशत व विश्वया कूल गार्हस्थ उत्पादनया ६३ प्रतिशत थाय् कयाच्वंगु दु ।

सम्बन्धित बुखँ

LEAVE YOUR COMMENTS