येँ मनपां सफाइ कर्मचारी कटौती याइगु

येँ – सरकारं चालु आर्थिक दँय् विद्युतीय सवारी साधन संचालनया निंतिं सहज जुइमा धयागु लक्ष्य तयाः २० गू चार्जिङ्ग स्टेशन दयेकीगु जूगु दु । विद्युतीय सवारी साधनया प्रवद्र्धनयात बः बियाः पेट्रोलियम पदार्थया परनिर्भरता म्हो याना यंकेगु लक्ष्य तयाः चार्जिङ्ग स्टेशन दयेकेत विशेष बः बिउगु खः ।

ऊर्जा, जलस्रोत व सिँचाइ मन्त्रालयं तयार याःगु चालु आर्थिक दँया कार्ययोजनाय् विद्युतीय सवारी साधनया छ्यलाबुलायात देय्न्यंकं दयेकेत यक्व चार्जिङ्ग स्टेशन दयेकेगु ज्या दुथ्याकातःगु दु । सरकारं छुं न्हि न्ह्यव जक नं साझा यातायातयात स्वसःगः विद्युतीय बस न्यायेगु निंतिं स्वंगू अर्ब बजेट बीधुंकूगु दु ।

अथेहे प्रदेश नं. ३ सरकारं नं साझा यातायात लिसे जानाः विद्युतीय सवारी साधन संचालन यायेत तयारी यानाच्वंगु दु ।चार्जिङ्ग स्टेशनया निंतिं नेपाल विद्युत प्राधिकरणया माःगु प्रक्रिया न्ह्याकाच्वंगु दु । थज्याःगु स्टेशन दयेकेगु निंतिं आवश्यक जुइगु जग्गाया निंतिं बोलपत्रया ज्या नं सुरु जुइधुंकूगु दु । प्राधिकरणया कथं आःयात झिंस्वंगू चार्जिङ्ग स्टेशन संचालनय् दु ।

ऊर्जा, जलस्रोत तथा सिँचाइ मन्त्रीइ वर्षमान पुनया कथं विद्युतीय सवारी साधनयात प्रवद्र्धन यायेगु लक्ष्य तयाः चार्जिङ्ग स्टेशन दयेकेगुत विशेष प्राथमिकता बीत्यंगु खः ।लिपांगु इलय् विद्युतीय सवारी साधनया आकर्षण नं अप्वया वनाच्वंगु दु । निजी क्षेत्रया सुन्दर यातायातं विद्युतीय बस संचालन यायेगु तयारी यानाच्वंगु दु ।

पेट्रोलियम पदार्थया तुलनाय् विद्युतीय सवारी साधनया दैनिक संचालन खर्च तसकं म्हो जुइगु जूगुलिं नं थुकीपाखे यक्वसिया आकर्षण अप्वःग खः ।मन्त्री पुनं विद्युतीय सवारी साधनया निंतिं मन्त्रालयपाखें आवश्यक जुइगु फुक्क कथंया ग्वाहािल चूलाकाबीत प्रतिबद्धता प्वंकादी धुंकूगु दु ।

चालु आर्थिक दँया अन्त्यतक राष्ट्रिय प्रशारण प्रणालीय थप १२०० मेगावाट स्वयां अप्वः मत स्वाः वयेत्यंगु दुगुलिं नं विद्युत खपत अप्वयेकेमाःगु आवश्यक्ता खनेदु । प्राधिकरणया कार्यकारी निर्देशक कुलमान घिसिङ्गया कथं विद्युतीय सवारी साधनया निंतिं चार्जिङ्ग स्टेशन दयेकेगु निंतिं प्राधिकरणपाखें ज्या सुरु जुइधुंकूगु दु ।

प्राधिकरणय् थ्वयां न्ह्यव हे चार्जिङ्ग स्टेशन दयेकाः संचालनय् नं वयेधुंकूगु दु । अथेहे प्राधिकरणया सहायक कम्पनी एनयए इन्जिनियरिङ्ग कम्पनीं नं विद्युतीय सवारी साधनया चार्जिङ्ग स्टेशन संचालनय् हयेधुंकूगु दु । तर चार्ज यायेबलय् पुलेमाःगु शुल्कया बारे धाःसा आःतक निर्णय मजूनि । प्राधिकरणं थ्व बारे याकनं हे निर्णय यायेगु खँ धाःगु दु ।

सम्बन्धित बुखँ

LEAVE YOUR COMMENTS