गोदामय् सुचुका तःगु चिनी ज्वन

येँ (नेपालभाषा टाइम्स)÷वाणिज्य विभागं चिनीया हाकुबजाः याःगु धासें येँया कुलेश्वरय् च्वंगु छगू गोदाम शिल याना बिउगु दु । कुलेश्वरया गुह्येश्वरी टे«ड लिंकया गोदामय् ७० हजार किलो चिनी भण्डारण यानातःगु लुइवं अन शिला याना बिउगु खः । वाणिया विभागं चिनीया गुणस्तर जाँच यायेत छ्वःबलय् अन चिनी भण्डारण यानातःगु नं लूगु
खः ।

व्यवसायी सन्तोष खेतानं सञ्चालन यानाच्वंगु उगु फर्मं उद्योगपाखें दंगु भावय् चिनी न्यानाः येँया बजारय् बिल मबिसे थिकेगु भावं चिनी मियाच्वंगु उजुरी विभागय् लाःगु खः । खेतानं चिनी किलों १२७ तका कयाः मियाच्वंगु खःसां नं बिल बीबलय् धाःसा १०५ तकाया जक बीगु यानाच्वंगु खः ।

थ्व स्वयां न्ह्यः प्रति किलो ११० तकां मियाच्वंगु चिनी नखःचखः न्ह्यःने वयेवं व्यापारीतय्सं भाः थकयाः १४० तका थ्यंकूगु दु । खेतानं दंक चिनी न्यानाः उकियात भण्डारण यानाः नखःया इलय् थिकेगु भावं मिउगु खँ विभागं धाःगु दु ।

तर उपभोक्तातय्सं धाःसा नखःचखः न्ह्यःने थ्यंकः वयेवं चिनी जक मखु बजारय् मेमेगु खाद्यान्नया भाः नं अस्वाभाविक रुपं थहां वनाच्वंगु खँ धाःगु दु ।

नेपालभाषा टाइम्स

च्वमिया मेमेगु

• ‘नुगः चफुना’ या म्यूजिक भिडियो पिदन
• नेपालभाषाया न्हूगु श्रृंखला वइगु
• एनपिएल ः जनकपुर व चितवन त्यात
• बौद्धविद्वान प्रजापतिया हना
• प्रधानमन्त्री ओलीया चीन भ्रमण, छुं न्हूगु सम्झौता मजुइगु