पानीजहाजया अध्ययन न्ह्याकीगु

येँ – सरकारं नेपालय् पानीजहाज सञ्चालन सम्बन्धी प्रारम्भिक अध्ययन न्ह्याकेगु तयारी याःगु दु । ऊर्जा, जलस्रोत व सिँचाई मन्त्री वर्षमान पुनं जल तथा ऊर्जा आयोगया सहसचिव माधव बेलबासेया नेतृत्वय् अध्ययन पुचः नीस्वंगु दु । उगु समितिइ भौतिक पूर्वाधार व यातायात व्यवस्था मन्त्रालय, परराष्ट्र, वाणिज्य मन्त्रालय व ऊर्जा व सिँचाइ मन्त्रालयया प्रतिनिधि सदस्य कथं च्वनीगु खँ धाःगु दु ।

समितिं कोशी, गण्डकी व कर्णाली खुसिया नेपाःया भूभाग व भारतीय भूभागय् लःया बहाव, खुसिया चौडाइ लगायतया अध्ययन याइ । प्रधानमन्त्री केपी ओलीं लिपांगु भारत भ्रमणया झ्वलय् नेपालय् पानीजहाज हयेगु सम्बन्धय् सहमति याःगु खः । थुगु अध्ययनया निंतिं सरकारं ३० लाख तकाया बजेट विनियोजन याःगु दु । समितिं खुसिइ गुलि क्षमताया जहाज हयेफइ धइगु बारे अध्ययन यानाः प्रतिवेदन दयेकीगु खँ धाःगु दु ।

भारतं गंगा खुसिया कालु घाटय् पानी जहाज सञ्चालनया निंतिं माःगु पूर्वाधार दयेकाच्वंगु दु । अन तक २ हजार मेट्रिक टनया जहाज हयेगु भारतया योजना दु । नेपालं नं कालुघाटं कोशी, गण्डकी व कर्णाली खुसि जुयाः नेपाः तक पानी जहाज हयेगु कथं अध्ययन यायेत्यंगु खः । प्रारम्भिक अध्ययन कथं नेपालय् ५ सय मेट्रिक टन तकया पानी जहाज हयेफइगु अनुमान यानातःगु दु ।