१०७ जलविद्युत आयोजना निर्माणया चरणय्
येँ – जलविद्युत आयोजनाया २ हजार ३५६ मेगावाट क्षमताया १०७ गू आयोजना निर्माणया चरणय् दुगु खँ धाःगु दु । नेपाल विद्युत प्राधिकरणया कथं उगु आयोजनात निर्माणया थीथी चरणय् दु । वित्तीय व्यवस्थापन यानाः दयेकाच्वंगु उगु आयोजना मध्ये अप्वः धयाथं वइगु दँय् दयेकेगु ज्या क्वचाइगु खँ नं प्राधिकरणं दावी दु ।
प्राधिकरणया ३३ क्वःगु वार्षिकोत्सवया लसतय् पिथंगु विवरण कथं राष्ट्रिय गौरवया आयोजनाया रुपय् दुगु माथिल्लो तामाकोशी थुगु हे दँय् क्वचाइगु चरणय् दु । उगु आयोजना वइगु पुस मसान्त तक दयेकेगु ज्या क्वचायेकेगु आज्जु तयातःगु दु ।
अथेहे चिलिमे जलविद्युत कम्पनीया सहायक कम्पनीं दयेकाच्वंगु १११ मेगावाट क्षमताया रसुवागढी जलविद्युत आयोजनां सुरुङ दयेकेगु ज्या क्वचायेकूगु दु । विद्युतगृह लगायताया ज्या धाःसा न्ह्यानाच्वंगु दु । अथेहे १४.८ मेगावाट क्षमताया माथिल्लो साञ्जेन, ४२ दशमलव ५ मेगावाट क्षमताया साञ्जेन नं निर्माण सम्पन्न जुइगु चरणय् दुगु खँ प्राधिकरणं धाःगु दु ।
सरकारी स्वामित्व व निजी लगानइया आपालं धयाथें आयोजना वइगु आर्थिक दँया क्वचाइ कथं ज्या जुयाच्वंगु प्राधिकरणं धाःगु दु ।
अथेहे १४ मेगावाट क्षमताया कुलेखानी तेस्रो, ६० मेगावाट क्षमताया माथिल्लो त्रिशुली ‘थ्री ए’ नं थुगु हे दँय् क्वचाइगु खँ धाःगु दु । प्राधिकरणया कथं वइगु आवया अन्त्यय् नेपाःया मुक्कं जडित क्षमता २ हजार २७४ मेगावाट थ्यनी ।
प्राधिकरणं नं प्रक्षेपण याःगु तथ्यांकया आधारय् दँय् १० प्रतिशत जक मत माग अप्वल धाःसा नं १ हजार ७५० मेगावाटया हाराहारीइ जक माग जुइ । तर नेपाःया अप्वः धयाथें आयोजना न्ह्यानाच्वंगु खसीइ उत्पादन जुइगु जुयाः वर्षाया इलय् मत अप्वः उत्पादन जुइगु जुयाच्वंगु दुसा हिउँदया इलय् म्हो जक मत उत्पादन जुयाच्वंगुलिं मतया व्यवस्थापन यायेत अझ नं छुं ई काइगु खँ नं प्राधिकरणं धाःगु दु ।
सरकारं वइगु स्वदँया दुने ३ हजार मेगावाट व वइगु न्यादँया दुने ५ हजार मेगावात मत उत्पादन यायेगु आज्जु तयातःगु दु । दयेकाच्वंगु व क्वचाइगु चरणय् थ्यंगु आयोजनायात स्वयेगु खःसा सरकारया आज्जु अःपुक हे पूवनीगु खनेदु ।
ऊर्जा, जलस्रोत व सिँचाइमन्त्री वर्षमान पुनं दयेकाच्वंगु आयोजनायात इलय् हे क्वचायेकेत मन्त्रालयं माःगु सहजीकरण यानाच्वंगुलिं गुगुं नं कथंया समस्या मवइगु प्रतिवद्धता प्वंकादीगु दु । अथेहे प्राधिकरणया कार्यकारी निर्देशक कुलमान हिसिङं नियमित रुपं आयोजनाया अनुगमन व माःगु सहजीकरण यानाच्वनादीगु दु ।
‘जिमिसं उपलब्ध याकूगु विवरण कथं हे ज्या जुल धाःसा सरकारया आज्जु अःपुक हे पूवंकेफइ ।’ निर्देशक घिसिङ धयादी । दयेकाच्वंगु व दयेकेगु लँपुइ लानाच्वंगु आयोजनापाखें न्यादँया दुने मुक्क जडित क्षमता थ्यंमथ्यं ४ हजार ५ सय मेगावाट थ्यनिगु अनुमान दु । माग अप्वया वनेगु झ्वलय् १० प्रतिशतया दरं अप्वल धाःसा २ हजार ५६० मेगावाट थ्यनिगु खनेदु ।
सरकारं वइगु न्यादँया दुने फुक्कं क्षेत्रय् मतया पहुँच थ्यंकेगु योजना दयेकातःगु दु । वित्तीय व्यवस्थापन पियाच्वंगु ७४ आयोजना
प्राधिकरणया कथं वित्तीय व्यवस्थापनयात पियाच्वंगु ७४ आयोजना दु । उगु आयोजनाया क्षमता १ हजार ६५८ मेगावाट दु ।
उगु आयोजनात नं इलय् वित्तीय व्यवस्थापन यानाः दयेकेगु ज्या न्ह्याकेगु लँपुइ दु । प्राधिकरणं निगू चीधंगु जलविद्युत आयोजनाया मत न्यायेगु सम्झौता रद्द याःगु दु । प्राधिकरणं नारायणी शंकर बायोमास व तामे खोलाया सम्झौता रद्द याःगु खः ।
LEAVE YOUR COMMENTS