सहकारी मोडेलय् तरकारि बजाः व्यवस्थापन यायेत सुझाव

येँ – थनया कालिमातिइ च्वंगु तरकारि तथा फलफुल बजार लिपांगु इलय् खने दुगु विवाद व समस्या समाधानया निंतिं तरकारि वितरणय् सहकारी मोडेल नालेत सुझाव बिउगु दु । कालिमातिइ च्वंगु तरकारि बजारलिसें मेमेगु बजारय् व्यापारी व बजार संचालक दथुइ खने दुगु विवाद समाधान यायेगु ल्याखं उकथं सहकारी मोडेल वनेमाःगु सुझाव कृषि सहकारी केन्द्रीय संघं बिउगु खः ।

संघं छगू विज्ञप्ती जारी यासे तरकारि बजाःया व्यवस्थापनय् ग्वाहालि यायेत थःपिंत तयार दुगु जक मखसे सक्षम नं जूगु दावी यानातःगु दु । लिसें सरकारं थःपिंत भाला बिल धाःसा किसानं उत्पादन याःगु तरकारि तप्यंक हे उपभोक्ताया दथुइ यंकाः बजाः व्यवस्थापन यायेत नं थःपिं तयार दुगु विज्ञप्तीइ धयातःगु दु ।

सरकार व निजी निगू पक्षया व्यपवस्थापनय् दुगु बजारं विक्री वितरण जुया वयाच्वंगु तरकारि लगायत मेमेगु कृषिजन्य उपभोग्य ज्वलनय् किसानयात दइगु व उपभोक्तां पुलीगु बजाः भाः गाक्कं फरक जूगु खँ ताःई न्ह्यवं वयाच्वंगु खःसा उतिकं विवादय् नं लानाच्वंगु दु ।

संघं देय्न्यंकंया गुसः स्वयां अप्वः कृषि सहकारीइ आवद्ध कृषि व्यवसायीनापं मेमेगु व्यवसायीनाप जानाः किसानं उत्पादन याःगु तरकारि बजारय् यंकंगु व बजारं तप्यंक उपभोक्तायाथाय् तक थ्यंकेत थःपिं सक्षम जूगु दावी याःगु दु ।