
बेलायती विदेशमन्त्री जेरेमी हन्टं अमेरिकी राष्ट्रपति डोनाल्ड ट्रम्पं बेलायत व प्रधानमन्त्री मेयात अनादर याःगु खँ धयादीगु दु । इमले चुहावट प्रकरणय् अमेरिकाया निंतिं बेलायती राजदूत सर किम डार्कयात ट्रम्पं ‘तसकं मूर्ख मनू’ धकाः ट्विट यायेवं बेलायती मन्त्रीया थ्व प्रतिक्रिया वःगु खः ।
बेलायती राजदूतं ट्रम्प प्रशासन प्रभावकारी मजूगु धयागु टिप्पणी यानाः च्वयातःगु इमेल लिक जुइवं ट्रम्पं छसिकथं ट्विट यासें बेलायती राजदूतया आलोचना याःगु खः । थ्व झ्वलय् ट्रम्पं युरोपेली संघं बेलायत पिहां वयेगु निंतिं जुयाच्वंगु बे्रक्जिट प्रक्रियाय् प्रधानमन्त्री में यानाच्वंगु ज्याया नं आलोचना यानादीगु खः ।
ट्रम्पं थःगु सुझावयात प्रधानमन्त्री में वास्ता मयाःगु व मूर्ख लँपु अवलम्बन याःगु टिप्पणी याःगु खः ।ट्रम्पया ट्विटयात कयाः प्रतिक्रिया बीगु झ्वलय् बेलायती विदेशमन्त्री हन्टं धाःगु दु, ‘जिमि पासापिंसं स्पष्ट रुपं न्ववाइ,, जिं नं अथे यानाः । ट्रम्पया टिप्पणी जिमि प्रधानमन्त्री व जिगु देय्प्रति अनादरपूर्ण दु ।’
वय्कलं थः प्रधानमन्त्रीइ निर्वाचित जुल धाःसा क्रिसमसया इलय् अवकाश मकाःतले सर किमयात राजदूतय् हे निरन्तरता बीगु खँ नं धयादीगु दु । अथेहे बेलायती प्रधानमन्त्रीया कार्यालयं नं सर किमप्रति पूर्ण समर्थन दुगु खँ धायेधुंकूगु दु । प्रधानमन्त्री मेया छम्ह प्रवक्तां सर किम छम्ह कर्तव्यपरायण व सम्मानित सरकारी अधिकारी जूगु खँ धाःगु दु ।
थ्व इमेल प्रकरण लिपा द्विपक्षीय सम्बन्धयात कयाः मे व ट्रम्प दथुइ छुं सहलह यायेगु योजना नं मदुगु खँ बेलायती प्रधानमनत्री कार्यालयं धाःगु दु । डाउनिङ स्ट्रिटया थ्व धापुलिं ट्रम्प झन हीमी चाःगु खः ।
LEAVE YOUR COMMENTS