४००० गः कार ज्वानावःगु जहाज आन्ध्र महासागरय् डुन

एजेन्सी- पोर्चुगलया अजोर्ज द्वीपसमूह नापसं आन्ध्र महासागरय् प्यद्वःगः विलासी कार ज्वानावःगु छगः पानीजहाज डुबे जूगु दु । फेलिसटी नांयाःगु जहाजय् पोर्श व बेन्ट्लीया लिसें मेमेगु कार यानाः थ्यमथ्यं प्यद्वः कार दुगु खः । जर्मनीया बन्दरगाह एम्डेनं अमेरिकाया आइल्यान्डय् वनाच्वंगु जहाजय् निवाः न्ह्यः मिं नःगु खः । जहाजय् वंगु फेब्रुअरी १३ तारिखय् मिं नःगु खः । जहाजय् दुपिं चालक दलनिसें दक्वः कर्मचारीतय्गु उद्धार जुइधुंकूगु दु ।

जहाज आन्ध्रमहासागरया ३५०० मिटर क्वयेतक थ्यंगु बिबिसिं जानकारी बिउगु दु । फाइअल टापु बन्दरगाहया प्रमुख जोआओ मेन्जिस कोबिसं समचार संस्था रोयर्टसयात धाःकथं समुद्रय् चिंक ज्वःगु सिमदुनी, तर जहाजया इन्धनया ट्याङ्की क्षति जूगु शंका याःगु दु ।

पोर्चुगलया जलसेनां जहाजय् मिं नःगु जूसां सुं घाःपाः मजूगु व जहाजय् दुपि दक्वः २२ म्ह कर्मचारीतय्गु उद्धार जुइधुंकूगु धाःगु दु । उगु लागाय् वनाच्वंगु मेगु प्यंगः जहाज व पोर्चुगलया वायुसेना उद्धारय् ब्वति काःगु खँ धाःगुदु ।

कार निर्माता कम्पनी भक्सवागनया कथं समुद्रय् दुंगु फुक्कं कारया बीमा दु । रोयटर्सया कथं उगु कारया मू फुक्कं यानाः १५.५ करोड डलर थ्यंवः । जहाजय् १८९ गः थःपिनिगु कार दुगु बेन्ट्लीं धाःगु दुसा पोर्शया ११०० गः कार दुगु खँ धाःगु ।