अमेरिकाय् बन्दूकधारीया आक्रमणय् झिंछम्ह सित

अमेरिकाया पेन्सिलभानिया राज्यया पिटसबर्ग शहरय् छम्ह बन्दूकधारीया आक्रमणय् लानाः झिंछम्हेसिया ज्यान वंगु दु । ट्री अफ लाइफ नांया छगू यहुदी प्राथना छेँय् स्थानीय ई कथं शनिवाः प्रार्थना जुयाच्वंगु इलय् बन्दूकधारीतय्सं गोली कयेकूगु खः । गोली कयेकूपिं बन्दूकधारी–तय्त प्रहरीं ज्वनेधुंकूगु दु ।

अमेरिकी संचार माध्यमतय्सं धाःकथं सकलें युहदीत सीमा धकाः नारा थ्वयेकाः बन्दूकधारीतय्सं गोली कयेकूगु खः ।राष्ट्रपति डोनाल्ड ट्रम्पं थ्व छगू तःधंगु हत्याकान्ड जूगु व तःम्ह मनूत सीगु प्रतिक्रिया बियादीगु दु । आक्रमण याःम्ह आक्रमणकारी ४६ दँया रोबर्ट बोबर्स जूगु खँ धाःगु दु । थ्व घटनाय् घाःपाः जूम्ह उम्ह आक्रमणकारीया आः उपचार जुयाच्वंगु खँ प्रहरीं धाःगु दु ।

मेखे गोली लानाः घाःपाः जूपिं मेपिं निम्ह सर्वसाधारणया अवस्था नं गम्भीर दुगु खँ धाःगु दु । संघीय अनुसन्धातकर्तातय्सं थ्व गोलीकाण्ड घृणाया कारणं जूगु अपराध धकाः धाःगु दु ।द एन्टी डिफेमेशन लिग नांया छगू गैरसरकारी यहुदी संस्थां धाःगु दु, ‘संयुक्त राज्य अमेरिकाया इतिहासय् यहुदी समुदायय् जूगु थ्व दकलय् तःधंगु हिंसात्मक आक्रमण जूगु जिमिगु विश्वास दु ।’

राष्ट्रपति ट्रम्पं घटनास्थलया अवलोकन यायेगु खँ धाःगु दु । घटना लिपा पत्रकारतलिसे खँ ल्हासें ट्रम्पं आक्रमणकारी थः समर्थक जुइफइमखु धासें आक्रमण याम्ह मनू ‘अस्वस्थ’ जूगु खँ धाःगु दु ।