हंगकंगय् तःधंगु प्रदर्शन
विदेशी शक्तिया ल्हाः दुगु चीनया द्वपं
हंगकंगय् प्रहरी व प्रदर्शनकारी दथुइ हिंसात्मक झडप जूगु दु । सुपुर्दगी सम्बन्धी छगू प्रस्तावित कानुनया विरोधय् लाखौं मनूत प्रदर्शनय् कुहां वःगु खः । प्रदर्शनकारीतय्त थ्व प्रस्तावित कानुनं चीनयात हंगकंगय् च्वंपिं थः राजनीतिक विपक्षीयात निसाना दयेकी धयागु चिन्ता जुयाच्वंगु दु ।
चिनियाँ सञ्चारमाध्यमतय्सं हंगकंगय् जूगु प्रदर्शनय् विदेशी शक्तिया ल्हाः दुगु द्वपं बिउगु दु । विदेशी शक्तितय्सं चीनयात चोट बीत हंगकंगय् विध्वंश हयेत स्वःगु खँ अनया सरकारी संचारमाध्यमं न्ह्यथँगु दु ।तुयुगु लँ पुनावःपिं प्रदर्शनकारीतय्सं तच्वःगु गर्मी जूसां ताःई तक प्रदर्शन याःगु खः ।
प्रदर्शनय् तःधंगु ल्याखय् व्यवसायी, कानुनया विद्यार्थी, धार्मिक समूह व प्रजातन्त्रया पक्षधरतय् सहभागी दुगु खँ धाःगु दु । हंगकंगया नेत्री क्यारी लामं धाःसा विरोध जूसां सुपुर्दगीया योजना लित मकायेगु खँ धाःगु दु । सोमवाः संवाददातातलिसे खँ ल्हासें हंगकंगया कार्यकारी प्रमुख ल्यामं थ्व कानुन आवश्यक दुगु खँय् बः बिसें थुकी मानवाधिकारया रक्षा जुइगु खँ धयादीगु दु ।
प्रर्दशनकारीतय्सं विरोध ¥यालीं झिगू लाख मनूत सहभागी दुगु खँ धाःगु दु । निगू दशक लिपा हंगकंगय् थज्याःगु तःधंगु प्रदर्शन जूगु खः । तर प्रहरीं धाःसा थ्व प्रदर्शनय् निगू लाख ४० हजार जक मनूत सहभागी जूगु खँ धाःगु दु । आयोजकतय् अनुमान ठीक खःसा सन् १९९७ य् हंगकंग चीनयात हस्तान्तरण याःबलय् जूगु प्रदर्शन धुंकाः थ्व दकलय् तःधंगु प्रदर्शन जुइ ।
¥याली क्वचायेधुंकाः प्रहरी व सयौं प्रदर्शनकारी दथुइ झडप जूगु खः । ख्वाःपाः पुनातःपिं प्रदर्शनकारीतय्सं प्रहरी तयातःगु बार चिइकाः विधान परिषदय् दुहां वनेगु कुतः याःगु खः । थ्व लिपा प्रहरीं अश्रुग्यास कयेकाः लाठी चार्ज याःगु खः ।
LEAVE YOUR COMMENTS