खुसिइ लः थहांवयाः ताँ खतराय्

येँ – बेनी–जोमसोम–कोरला सतक आयोजना अन्तर्गतया बेनी नगरपालिका ९ गलेश्वरया राहुघात खुसिइ दयेकातःगु बेलिबिजं त्वःधुइगु अवस्थाय् थ्यंगु दु । आइतवाः चान्हय् रघुगंगा खुसिइ लःया सतह थहां वयाः गलेश्वरपाखे कटान याना हयेवं पक्की ताँ त्वःधुलीगु अवस्थाय् वःगु खः । खुसिया बहाव हिलेवं गलेश्वर बजाःया छुं भाग नं खतराय् लानाच्वंगु दु ।

निर्माणाधीन कालीगण्डकी करिडोरया बेनी–जोमसोम खण्डया अप्वः थें ताँ जोखिमय् लानाच्वंगु दु । थ्व क्षेत्रया कालीगण्डकी करिडोर दयेकेगु ज्या जुयाच्वंगु दु । गलेश्वरया बेलिबिजं खतराय् लानाच्वंगुलिं आः दयेकाच्वंगु मेगु बेलिब्रिज याकनं दयेके क्वचायेकेत दबाब बियाच्वनागु जूसां ताँ दयेकेगु ठेक्का कयातःगु शर्मा युनाइटेड विल्डर्स जेभीं वास्ता मयानाच्वंगु खँ स्थानीय बासिन्दां धाःगु दु ।

म्याग्दीया प्रमुख जिल्ला अधिकारी लीलाधर अधिकारीं गलेश्वरया बेलिब्रिज तःधंगु जोखिम दुगुलिं छुं नं इलय् बेनी–जोमसोम सडकखण्ड अवरुद्ध जुइफुगु खँ धयादीगु दु । वय्कलं आयोजना प्रमुखयात तत्काल संरक्षणया ज्या न्ह्याकेत निर्देशन बीधुनागु खँ नं धयादीगु दु ।

गलेश्वरया बस्ती व ताँ बचे यायेत तत्काल तटबन्ध दयेकेमाःगु स्थानीयतय् माग दु । तत्काल खुसिं कटान यानाहःगु पनेमफुत धाःसा ताँ त्वःधुलाः मुस्ताङ व उत्तरी म्याग्दीया यातायात सम्पर्क त्वादीगु खँ स्थानीयतय्सं
धाःगु दु ।