पाकिस्तानी मुद्रा नेपाली ध्यबा स्वयां कुहांवन

अन्तर्राष्ट्रिय रुपं नांजाःगु आर्थिक समाचार पोर्टल ब्लुमबर्गं पाकिस्तान मुद्रा नेपाःया मुद्रा स्वयां अवमूल्यन जूगु खँ धाःगु दु । आः पाकिस्तान मुद्रा एसियाया हे दकलय् कमजोर मुद्रा जूवंगु दु । थगुने पाकिस्तानी मुद्रा २० प्रतिशत स्वयां अप्वः कुहांवःगुलिं आः थ्व एसियाया दकलय् कमजो मुद्रा जूवंगु खँ ब्लुमबर्गं धाःगु दु ।

पाकिस्तानी पत्रिका जंगया कथं थ्व मे महिनाय् जक पाकिस्तानी मुद्राय् २९ प्रतिशतं कुहां वंगु दु । पाकिस्तानया तुलनाय् अफगानिस्तान, बंगलादेश व नेपाःया मुद्रा स्थिर जुयाच्वंगु दु ।थौंकन्हय् १ डलर बराबर अफगानिस्तानया मुद्रा ७९, भारतीय रुपैयाँ ७०, बांग्लादेशया टाका ८४ व नेपाली रुपैयाँ ११२ तका थ्यनाच्वंगु दु ।

तःधंगु उथलपुथलया कारणं पाकिस्तानया मुद्रा धाःसा १ डलरया १४९ तका तक पाकिस्तानी ध्यबा थ्यंगु दु । पाकिस्तानया मनि एक्सिचेन्ज कम्पनी एशोसियसनया कथं खुला बजाःया कारणं १ डलरया १५१ तका तक थ्यंगु दु । निन्हुया दुने हेपाकिस्तानी रुपैयाँ ५ प्रतिशतं अवमूल्यन जुइगुवं थुकिं बजारय् तःधंगु हचलचल हःगु खः ।

पाकिस्तानी दैनिक ‘डन’या कथं बजारय् उथलपुथल वयेवं प्रधानमन्त्री इमराजन खानया वित्तीय मामिला सल्हाकार हाफिज सेख व्यवासयीतय्त नापलायेत बिहिवाः कराँची थ्यंकःवंगु खः ।