बिमस्टेक सम्मेलनय् विद्युत आदान प्रदानया निंतिं बहुपक्षीय समझदारी जुइगु

येँ – बहुक्षेत्रीय प्राविधिक व आर्थिक ग्वाहालिया निंतिं बंगालया खाडीया कुतः (बिमस्टेक) या प्यक्वःगु शिखर सम्मलेनय् विद्युत व्यापार व आदान प्रदानया निंतिं मार्ग प्रशस्त यायेगु कथं समझदारी जुइगु जूगु दु । विद्युत व्यापार व सहजीकरणया निंतिं ‘बिमस्टके ग्रीड’ दयेकेगु व उकियात प्रभावकारी रुपय् कार्यान्वयनय् हयेगु तयारी जुयाच्वंगु खः ।

सरकारं उगु ग्रीड सम्बन्धी द्विपक्षीय समझदारी पत्रय् हस्ताक्षर यायेगु निंतिं परराष्ट्रमन्त्री प्रदीपकुमार ज्ञवालीयात अख्तियारी बिउगु दु ।
सम्मेलनया झ्वलय् दुजः देय्तय् दथुइ विद्युत प्रसारण लाइन (पावर ग्रीड) दयेकेगु विषयसं सम्झौता जुइ । उकिं न्हय्गुलिं दुजः राष्ट्र दथुइ विद्युत व्यापार सहज जुइगु विश्वास यानातःगु दु ।

नेपाल व भारत दथुइ थ्व स्वयां न्ह्यः हे विद्युत आदान प्रदान व व्यापार सम्झौता जुइधुंकूगु दु । वंगु महिनाय् जक नेपाल व बंगलादेश दथुइ अज्याःगु हे सम्झौता जूगु खः । बिमस्टेकया झिंखुगू प्राथमिकता क्षेत्र निर्धारण यानाः उकियात समन्वय यानाः मू न्यागू क्षेत्रयात प्राथमिकता निर्धारण यानातःगु दु । उकी दकलय् न्हापांगु प्राथमिकता क्षेत्रय् सम्पर्क सञ्जाल दु ।

अथेहे उकी रेलवे, सडक, विद्युत, प्रसारण लाइना, सूचना प्रविधिया निंतिं अप्टिकल फाइवर लायेगु व हवाई सम्पर्क थेंज्याःगु विषय दुथ्यानाच्वंगु दु । प्राथमिकताया सूचीइ तयातःगु बिमस्टेक ग्रीड दयेकेगु सहमति लिपा नेपालय् उत्पादन जुइगु मत भारत, बंगलादेश, म्यान्मार जुयाः थाइल्याण्ड तका थ्यंके फइगु खँ धाःगु दु ।

बंगलादेशं ऊर्जा क्षेत्रय् नेपालय् तत्काल १ खर्ब बराबरया लगानी यायेगु प्रतिवद्धता प्वंकेधुंकूगु दु । वंगु महिनाय् नेपाः भ्रमणय् वम्हm बंगलादेशया विद्युत, ऊर्जा व खनिज राज्यमन्त्री नसरुल हमिदं बंगलादेश नेपाःया ऊर्जा क्षेत्रय् लगानी यायेगु तयार दुगु खँ धयादीगु खः ।
बिमस्टेक ग्रीड दयेकेगु सम्बन्धी समझादारी पत्रय् हस्ताक्षर जूसां नं विद्युत व्यापार व आदान प्रदानया निंतिं द्विपक्षीय रुपय् दुजः देय्तय् दथुइ सम्झौता धाःसा जुइमाः ।

परराष्ट्रमन्त्री ज्ञवालीं वंगु भदौ ८ गते ग्वसाः ग्वःगु पत्रकार सम्मलेनय् बिमस्टेक ग्रीड दयेकेगु विषयसं महत्वपूर्ण समझदारी जुइगु जानकारी बियादीगु खः । दक्षिण एसियाली क्षेत्रीय सहयोग संगठन (सार्क) या १८ क्वःगु शिखर सम्मेलनय् सार्क ग्रीड दयेकेगु व विद्युत आदान प्रदान यायेगु सम्बन्धी समझदारी जूगु खः ।

उकियात कार्यान्वयन यायेगु निंतिं दुजः राष्ट्र पिंसं विशेष कुतः यायेमाःगु खनेदु । बिमस्टेक ग्रीड कार्यान्वयनय् वल धाःसा उकिया लबः दकलय् अप्वः नेपाल व भुटानयात वइगु विश्वास यानातःगु दु ।बंगलादेशय् ऊर्जाया माग अप्वया वनाच्वंगु दु । अथेहे म्यान्मार व थाइल्याण्डय् नं ऊर्जाया माग अप्वया वनाच्वंगुलिं थुकिं नेपालं फाइदा कायेफइगु खँ धाःगु दु ।

तर उकिया निंतिं नेपालं ऊर्जा क्षेत्रय् तःधंगु लगानी दुकायेमाःगु खँ धाःगु दु । स्वतन्त्र ऊर्जा उत्पादन संस्था –इपान) या अध्यक्ष शैलेन्द्र गुरागाईं बिमस्टेकया मेगु राष्ट्र भारतलिसें प्रसारण प्रणाली छ्यलेगु विषयसं समान अवधारणया लिसें सहलह यानाः क्वःछिइमाःगु सुझाब बियादीगु दु । ‘सामुहिक हितया निंतिं फुकस्यां समान आज्जुया लिसें कुतः याःसा जक अन्तरदेशीय ग्रीड सञ्चालन यायेफइ ।

गुगुं छगू देशं कार्यान्वयनय् चिउताः मतल धाःसा थप समस्या वयेफइ । उखेपाखे विशेष ध्यान बीमाःगु खनेदु’ अध्यक्ष गुरागाईं धयादी ।
अन्तर क्षेत्रीय व्यापार, लगानी, पर्यटन प्रवद्र्धनयात कःघानागु खँ कनादिसें मन्त्री ज्ञवालीं थुुगु क्षेत्रया दुजः देय् दथुइ मुस्किलं न्यागू खुगू प्रतिशत जक व्यापार जुयाच्वंगु खँ बांलाःगु मखु धासें थुकियात कयाः थःपिंसं विशेष चिउताः प्वकाच्वनागु खँ कनादिल ।

वय्कलं ग्रीड दयेकेगु सम्बन्धी समझदारी पत्रय् हस्ताक्षर जक यानाः मजिउ धासें उकियात प्रभावकारी कार्यान्वयन हयेत कुटनीतिक रुपय् सशक्त रुपय् कुतः समेत यायेमाःगु खँ कनादिल ।

सम्बन्धित बुखँ

LEAVE YOUR COMMENTS