डलरया नापनापं लुँया भाः नं कुहां वनाच्वन

येँ- कोरोनाया लहर व्याप्त जुयाच्वंगु इलय् नेपाःया बजारय् लुँया भाः कुहां वःगु दु । वंगु असार १ गते तक तोलां ९३,२०० तका थ्यंगु छापावाला लुँया भाः म्हिगः कुहां वयाः ९०,८०० तका जू वल ।

विश्व बजारय् अमेरिकी डलरया भाः कुहां वनाच्वंगु इलय् नं लुँया भाः कुहां वनाच्वंगुलिं बजाः विश्लेषकत अजूचाःगु दु । अमेरिकाया फेडरर बैंकया प्रमुखं छुं न्हिं न्ह्यः बैंकं बिया वयाच्वंगु ब्याजदर अप्वयेकेगु संकेत बीवं लुँया भाः कुहां वंगु खँ नेपाल सुनचाँदी व्यवसायी महासंघया पुलांम्ह अध्यक्ष लिसें बजाः विश्लेषक तेजरत्न शाक्यं कनादीगु दु ।

बैंकं सन् २०२३ दुने निक्वः तक ब्याज अप्वयेके फइगु खँ धायेवं लुँइ लगानी यानाच्वंपिंसं मेथाय् लगानी याःगुलिं लुँया भाः कुहां वंगु खँ शाक्यं कनादिल । अथे हे अमेरिकी रोजगार बजारय् रोजगारी अप्वःगुलिं नं लुँया भाः कुहां वंगु खः ।

कोरोना महामारी लिपा अमेरिकी रोजगार बजाः सुधार जुया वयेवं लुँइ लगानी याइपिंसं मेगु क्षेत्रय् लगानी याःगुलिं लुँया भाः अझ कुहां वयेफइगु सम्भावना दुगु खँ नं वय्कलं कनादिल । वंगु छुं न्हिं न्ह्यः विश्व बजारय् लुँ प्रतिऔंस १९१२ डलर दुगु खःसा म्हिगः तक १२६ डलर कुहां वयाः १७८६ डलर कायम जूगु दु ।

अन्तर्राष्ट्रिय बजारय् डलरया भाः कुहां वंसां नं नेपालय् धाःसा लुँया भाः गुलि कुहां वयेमाःगु खः उकथं कुहां वयाच्वंगु मदु । उकिया मू कारण भारतीय मुद्रा अवमूल्यन जूगुलिं खः ।

सम्बन्धित बुखँ

LEAVE YOUR COMMENTS