
वीरगञ्ज – सरुहठ्ठा–९ रौतहतया किसान मो. उस्मान थःम्हं उत्पादन यानागु गोलभ्यारा मी मफयेवं तच्वःगु आर्थिक द्यापं फयेमालाच्वंगु दु । मेमेगु दँया तुलनाय् थ्व दँय् गोलभ्याराया उत्पादन बांलाःसां भारतीय गोलभ्यारा अप्वm दुहां वःगुलिं उस्मानया व्यापारय् तप्यंक हे लिच्वः लानाच्वंगु खः ।
पूर्वपश्चिम राजमार्ग अन्तर्गतया लालबन्दी बजाः गोलभ्याराया मू बजाः खः । तरकारी खेतीया निंतिं उर्वर भूमि धयातःगु सर्लाहीइ थ्व दँय् गोलभ्यारा उत्पादनय् न्ह्यथनेबह कथं वृद्धि जूसां भारतं दंगु भावं गोलभ्यारा दुहां वयाच्वंगुलिं लालबन्दी बजारय् नं गोलभ्यारा व्यापारय् लिच्वः लानाच्वंगु दु ।
थुगुसी शीतलहर मवःगुलिं गोलभ्यारा उत्पादन बांलाःसां भारतं अप्वः गोलभ्यारा दुहां वःगुलिं उचित भाः कायेमफयाच्वंगु किसानतय् धापु दु । गोलभ्यारा उत्पादन याना वयाच्वंम्ह किसान जयदेव घिसिङ्गं थगुनेया तुलनाय् निदुगं उत्पादन जूसां दंगु भावं मीमाःगुलिं खर्च धाने यायेत हे थाकुयाच्वंगु खँ कनादिल ।
सर्लाही जिल्लाया नवलपुर, सासापुर, अत्रौली, लालबन्दी, हरिओन, हुर्कौली रानीगञ्ज, बेलवास, बबरगञ्ज, बेला आदि थासय् किसानतय्सं व्यावसायिक गोलभ्यारा खेती याना वयाच्वंगु दु । थनं न्हिं १०० टन धयाथें गोलभ्यारा देय्या मूमू शहर स्वनिगः, नारायणघाट, हेटौंडा, बुटवल, पोखरा, वीरगञ्ज, गौर, सिन्धुली, रामेछाप, लहान, इटहरी तक यंकेगु यानाच्वंगु दु ।
स्वनिगःया कालिमाति व बल्खुया तरकारी बजारय् वर्चश्व तया वयाच्वंगु सर्लाही गोलभ्यारां थ्व पालय् स्वनिगलय् नं भाः कायेमफुत ।
गोलभ्यारा व परवलया निंतिं नांजाःगु लालबन्दीया तरकारी बजारय् थ्व दँय् भारतीय गोलभ्यारां कब्जा याःगुलिं स्थानीय किसानतय्सं गोलभ्यारा मियाः सोचे याःकथं आर्थिक लाभ कायेमफुत ।
न्हिं छगू करोडं मल्याक तरकारी कारोवार जुइगु लालबन्दी बजारय् थौंकन्हय् भारतीय गोलभ्याराया कारणं नेपाली गोलभ्यारा प्रति किलो न्यातका निसें झितकां मीत बाध्य जुयाच्वंगु दु ।
LEAVE YOUR COMMENTS