यातायात ख्यलय् वैदेशिक लगानीयात सरकारं सुरक्षा बी

येँ – भौतिक पूर्वाधार तथा यातायातमन्त्री रघुवीर महासेठं यातायात क्षेत्रय् दुहां वइगु वैदेशिक लगानीया सुरक्षा जिम्मा सरकारं काइगु खँ धयादीगु दु । नेपाल अटोमोबाइल एशोसियसन (नासा) व विश्व अटोमोबाइल संगठन (एफआइएं) ग्वसाः ग्वःगु निन्हुयंकंया विश्व अटोमोबाइल सम्मेलनया उलेज्या यानादिसें वय्कलं थ्व खँ धयादीगु दु ।

मन्त्री महासेठं नेपाःया विकासया निंतिं अन्तर्राष्ट्रिय लगानी आवश्यक जूगु धासें एफआइएयात लगानी यायेत इनाप नं यानादीगु खः । आःया सरकारया ध्यान हे सडक विकास व विस्तारय् वनाच्वंगु धासें वय्कलं थ्व क्षेत्रयात व्यवस्थित यानाः यंकीगु खँ नं बः बियादिल ।

चीन व भारतया ग्वाहालिं नेपालय् हवाई, जल व सतक यातायातया विकास जुयाच्वंगु व याकनं रेलमार्ग नं संचालनय् वइ धासें वय्कलं नेपालय् थौंकन्हय् ३ लाख २० हजार स्वयां अप्वः यातायात साधान चले जुयाच्वंगु खँ नं धयादिल ।

ज्याझ्वलय् एफआइए एशिया प्रशान्तया अध्यक्ष मिके नुनं विश्वया आर्थिक विकासया दुगःक्वँय् यातायात हे जूगु धासें एपआइएं सतक यातायातया लिसें पर्यटन व खेलकूद विकासयात प्राथमिकता बिया वयाच्वंगु खँ कनादिल । सम्मेलनय् नेपाःया लिसें २५ गू देया प्रतिनिधिपिंसं ब्वति कयाच्वंगु दु ।

सम्बन्धित बुखँ

LEAVE YOUR COMMENTS