जापानयात चिलीया ४ गोल

कोपा अमेरिकाया म्हिगः सुथय् जूगु कासाय् चिलीं जापानयात ४–० गोलं बुकल । जापानयात बुकेगु झ्वलय् म्यानचेस्टर युनाइटेडया एलेक्स साञ्चेजं न्याला लिपा थःगु न्हापांगु गोल याःगु दु ।सन् २०१८ जनवरीइ युनाइटेड वंसां निसें चोटया समस्यां फर्मय् मदुम्ह साञ्चेजं कासाया ८२ औं मिनेटय् गोल याःगु खः ।

वंगु जनवरी २५ य् एफए कपय् आर्सेनल विरुद्ध गोल यायेधुंकाः छुं नं धेंधेंबल्लाखय् साञ्चेजया थ्व न्हापांगु गोल खः । चिलीया विजयया निंतिं धाःसा इरिक पुल्गरं न्हापां अग्रता बिउगु खःसा इडुआर्डो भार्गसं निगू गोल यात । थ्व विजय लिपा चिल समूह ‘सी’इ उरुग्वे लिसें शीर्षस्थानय् दु । उरुग्वें नं आइतवाः इक्वेडरयात ४–० गोलं हे बुकूगु खः ।

जापानं कोपा अमेरिकाय् कतारलिसे पाहाँ टिम कथं ब्वति कयाच्वंगु दु । दक्षिण अमेरिकी धेंधेंबल्लाः कोपा अमेरिकाय् दक्षिण अमेरिकाया झिगू देश लिसें पिनेया निगू देय्यात पाहाँ कथं ब्वनेगु याना वयाच्वंगु दु । थ्व पालय् कतार व जापानयात एसियन च्याम्पियन व रनरअपया ल्याखं कोपाय् निमन्त्रणा याःगु खः ।