केन्द्रीय विभागय् गुरु हना ज्याझ्वः

यल (नेपालभाषा टाइम्स) – लुमन्ति दबूया ग्वसालय् गुरुपुुन्हिकुन्हु नेपालभाषा केन्द्रीय विभाग यलध्वाखाय् गुरु हना ज्याझ्वः जुल । दबूया नायः यादव प्रसाद रञ्जितया अध्यक्षताय् जूगु ज्याझ्वःया उलेज्या विभागया प्रमुख सह प्रा. डा. राजनलाल जोशीं त्वाःदेवाय् मत च्याकाः यानादीगु खः ।

उपस्थित सकसिनं मिखा तिसिनाः थः बुसांनिसें थौंया अवस्थाय् तक थ्यंकूपिं गुरुपिंत लुमंकाः न्ह्याःगु ज्याझ्वलय् दबूया सबिना महर्जनं लसकुस यानादीगु खः । ज्याझ्वलय् विभागया सकल गुरुपिंत नेवाः परम्पराकथं जाकि सिन्हः तिकाः क्वखा, धौ, ख्यें सगं बियाः हनेज्या याःगु खः ।

ज्याझ्वलय् नवासें विभागया प्रमुख सह प्रा.डा. जोशीं गुरु, शिष्य न्ह्याम्ह हे जूसां जीवनय् दकलय् तःधंगु ज्ञान अनुशासन खः धयादिल । विभागया स्यनामि शरद कसां ब्वनेगु धइगु शैक्षिक योग्यताया निंतिं दसिपौ कायेत जक मखसे थम्हं सयेके सीके यानागु ज्ञान व्यावहारिक जीवनय् नं छ्यले फयेकेमाः धयादिल ।

मेम्ह स्यनामि दीपा महर्जनं थःगु ब्वनेगु व ब्वंकेगु ज्या नापनापं जुयाच्वगु व जीवनय् बौद्धिक व व्यावहारिक ज्ञानया आवश्यक जूगु खँ कनादिसें म्हिगःया ब्वनामि हे थौंया स्यनामि (गुरु) जूगु दसू विभाग खः धयादिल ।

ज्याझ्वलय् ब्वँमिपिं ज्ञानराम श्रेष्ठ, शकुन्तला महर्जन नं नुगःखँ तयादीगु खःसा ब्वँमि अमिता रंजितं तयार यानादीगु शोध प्रबन्ध विभागया प्रमखु डा. जोशीयात लःल्हानादीगु खः ।