‘सामाजिक सद्भाव व शान्ति कायम यायेगु राज्यया प्राथमिक दायित्व’

येँ (नेपालभाषा टाइम्स) – प्रधानमन्त्री बालेन्द्र शाहं सुनसरीया देवगन्ज, सिराहा लगायत थासय् जूगु घटनाया विषययात कयाः राष्ट्रया नांमय् सम्बोधन यानादीगु दु ।

बिहीवाः बहनी सम्बोधन यानादिसें प्रधानमन्त्री शाहं प्रत्येक नागरिकया जीवन रक्षा, सामाजिक सद्भाव व समाजय् शान्ति कायम यायेगु राज्यया सर्वोच्च व प्राथमिक दायित्व जूगु धयादीगु दु । वय्कलं आम नागरिक, नागरिक समाज, धार्मिक न्ह्यलुवाः, राजनीतिक दल व संचारमाध्यमयात धैर्य व संयम जुयाः शान्ति, सद्भाव व राष्ट्रिय एकता कायम यायेत इनाप यानादिल ।

सम्बोधनया झ्वलय् वय्कलं थज्याःगु संवेदनशील अवस्थाय् सरकारी निकायपाखें जारी जूगु आधिकारिक सूचंयात जक विश्वास यायेत इनाप यानादीगु दु । सामाजि सञ्जाल वा मेमेगू माध्यमपाखें असत्य, अपुष्ट सूचना, अफवाह वा घृण ब्वलंकेगु ज्वलं व समुदाय दथुइ वैमनश्य अप्वयेकेगु अभिव्यक्ति प्रचार प्रसार मयायेत नं वय्कलं इनाप यानादीगु दु ।

वय्कलं घटनाया छानबिन पूर्णरुपं निष्पक्ष व पारदर्शी जुइगु धयादीगु दु । नापं वय्कलं घटनाय् संलग्न न्ह्याम्ह जूसां नं कानूनी दायराय् हयेत सरकार प्रतिबद्ध दुगु खँ धयादिल ।

नेपाःया संविधानं प्रत्येक नागरिकयात थःगु धर्म, संस्कृति व परम्परा माने यायेगु मौलिक हक बियातःगु धयादिसें प्रधानमन्त्रीं छुं नं धर्मं हिंसा व विभाजन यायेगु ज्या मस्यंगु न्ह्यथनादिल । वय्कलं शान्ति सुरक्षा भंग यायेगु, अराजकता ब्वलंकेगु व सयौं वर्ष पुलांगु सामाजिक सद्भाव स्यंकेगु छुं नं कथंया ज्याप्रति सरकार सचेत दुगु व अज्याःगु गतिविधि जूसाः कडा पलाः ल्ह्वनेगु धयादिल ।

प्रधानमन्त्री शाहं खस नेपाली व मैथिली भासं सम्बोधन यानादीगु खः ।