ब्राजिल व अर्जेन्टिना त्यात

मैत्रीपूर्ण कासा

प्रिमियरलिग कासामित रोबोर्टो फिर्मिनो व गाब्रिएल जिससया गोलया ग्वाहालिं ब्राजिलं बुधवाः जूगु मैत्रीपूर्ण कासाय् चेक रिपब्लिकयात ३–१ गोलं बुकूगु खः । प्रागय् जूगु कासाया ३७ औं मिनेटय् डेभिड पाभेल्काया गोलया ग्वाहालिं चेक रिपब्लिकां न्हापां अग्रता काःगु खःसां निगूगु हाफ सुरु जूगु प्यंगू मिनेट दुने हे लिभरपुलया फिर्मिनों गोल यासें कासा बराबरीइ हःगु खः ।

थ्व धुंकाः कासा क्वचायेत झिगू मिनेट ल्यं दनिबलय् म्यानेचस्टर सिटीया जिससं निगू गोल यासें ब्राजिलयात विजय चूलाकाबिउगु खः । जिससं कासाया ८३ आंै व ९० औं मिनेटय् छगू छगू गोल याःगु खः ।मेखे ब्राजिलया दक्षिण अमेरिकी प्रतिद्वन्द्वी अर्जेन्टिनां नं बुधवाः विजय चूलाकूगु दु ।

मोरक्को लिसे जूगु मैत्रीपूर्ण कासाय् एन्जेलो कोरियाया छगू गोलया ग्वाहालिं अर्जेन्टिनां विजय चूलाकूगु खः । वंगु शुक्रवाः जक भेनेजुएलापाखें ३–१ गोलं बूगु अर्जेन्टिनां म्हिगः नं विजयया निंतिं तःधंग संघर्ष यायेमाल । कप्तान लियोनल मेसी बिना मैदानय् कुहां वःगु अर्जेन्टिनाया निंतिं ८३ औं मिनेटय् कोरियां छगू जक गोल याःगु खः ।

वंगु शुक्रवाः जूगु कासाय् चोट लायेवं मेसी म्हिगःया कासाय् अनुपस्थित जूगु खः । मेसीया लिसें सर्जियो अग्युरो, एन्जेल डि मारियाया अनुपस्थितिइ म्हिगः अर्जेन्टिनाया आक्रमणया जिम्मा पाउलो डेबालाया ल्हातय् लाःगु खः ।

बुधवाः हे जूगु मेगु मैत्रीपूर्ण कासाय् आइभरी कोस्टं लाइबेरियायात १–० गोलं, नाइजेरियां इजिप्टयात १–० गोलं, जापानं बोलिभियायात १–० गोलं, दक्षिण कोरियां कोलम्बियायात २–० गोलं, सेनेगलं मालीयात २–१ गोलं, अल्जेरियां ट्युनिसियायात १–० गोलं व इस्टोनियां गिब्रल्टारयात १–० गोलं बुकलसा अमेरिकाया व चिली दथुया कासा १–१ गोलया बराबरीइ क्वचाःगु दु ।