सामाजिक सद्भाव कायम यानातयेत राष्ट्रपति, पुलांम्ह जुजु, पुलांम्ह प्रधानमन्त्रीया इनाप

येँ (नेपालभाषा टाइम्स) – राष्ट्रपति रामचन्द्र पौडेलं सुनसरीया देवानगञ्ज गाँउपालिका कप्तानगञ्जलिसें थीथी थासय् खनेदुगु ग्यानापुगु परिस्थितिप्रति चिन्ता प्वंकादिसें सलंसः दँनिसें दयावयाच्वंगु सामाजिक, धार्मिक, जातीय सद्भाव, सहिष्णुता, मेलमिलाप, भ्रातृत्व व राष्ट्रिय एकता कायम यायेत अपिल यानादीगु दु । राष्ट्रपति पौडेलं म्हिगः छगू अपिल जारी यासें शान्ति, अमनचयन व सुव्यवस्था कायम यानाः राष्ट्रिय एकतायात धिसिलाकेत फुक्क राजनीतिक दल, नागरिक समाज लिसें सकलें नेपाःमि तताकेहेँ व दाजुकिजापिंत इनाप याना धयादीगु दु ।

अथेहे पुलांम्ह प्रधानमन्त्री व एमाले अध्यक्ष केपी ओलीं नं छगू वक्तव्य जारी यासें जनतायात थवंथवय् ल्वाकेगु अवाञ्छित उद्देश्य पूवंकेत षडयन्त्र जुयाच्वंगु जुइफुगु खँय् सचेत जुइत इनाप यासें सामाजिक सद्भाव व एकता कायम यानातय्त इनाप यानादीगु दु । थ्व झ्वलय् वय्कलं अमानवीय ज्या दीगु पलेसा झन उग्र जुया वनाच्वंगु धासें राज्य पक्षं बल छ्यःगु खँय् आपत्ति प्वंकादीगु दु ।

अथेहे पुलांम्ह जुजु ज्ञानेन्द्र शाहं देय्या थीथी थासय् खनेदुगु सामाजिक व धार्मिक सद्भाव स्यंकेगु कुतःप्रति चिन्ता प्वंकादिसें नेपाःमितय् दथुइ एकता व मेलमिलाप हे आःया मू आवश्यकता खः धयादीगु दु ।