च्यागू गोल जूगु सनसनीपूर्ण कासा त्याकाः स्पेन क्वार्टरफाइनलय्

येँ– अल्भारो मोराटा व ओराएजबल नायक सावित जूगु कासाय् स्पेनं क्रोसियायात ५–३ गोलं बुंकाः स्पेन युरो कपया क्वार्टरफाइनलय् दुहां वनेत ताःलाःगु दु । कासाया सुरु पाखे हे स्पेनया गोलकिपर युनाइ सिमोन भिलेन सावित जूगु कासाय् मोराटा व आराएजबल एक्स्ट्रा इलय् विजयया निंतिं नायक सावित जूगु खः ।

थ्वयां न्ह्यःया कासाय् गोल याये मफयेवं आलोचना फयाच्वंम्ह मोराटां ३–३ गोलया बराबरीइ जुयाः कासा एक्स्ट्रा इलय् वंगु अवस्थाय् न्हापां गोल यासें स्पेनयात विजयया लँय् न्ह्याकूगु खः । कासाया सयौं मिनेटय् मोरोटां व १०३ औं मिनेटय् आराएज्बलं छगू छगू गोल याःगु खः । एक्स्ट्रा ई निगू गोल सहित थ्व छगू कासाय् च्यागू गोल जूगु खः । थुगुसीया युरो कपय् दकलय् अप्वः गोल जूगु थ्व हे कासा खः ।

कासाया २० औं मिनेटय् विपक्षीया दबाब मदुगु अवस्थाय् थःगु हे टिमया डिफेन्डरं बिउगु सामान्य पास बल गोलकिपर सिमोन थःगु तुतिं दिकेत स्वःगु खः, तर फ्लिक जुयाः थःगु हे पोस्टय् दुहां वनेवं स्पेन छगू गोलं लिउने लाःवंगु खः । तर३८ औं मिनेटय् सराबियां गोल यासें कासा बराबरीइ हयाबिल । निगूगु हाफ सुरु जूगु १२ मिनेट लिपा हे एज्प्लिक्वेटां गोल यासें स्पेनयात अग्रता बिलसा ७६ औं मिनेटय् फरान टोरेसं गोल यासें स्पेनयात थ्यंमथ्यं विजयया लँय् यंकूगु खः । तर लिपांगु २० मिनेट क्रोसियायात पने मफयेवं नियमित ९० मिनेटया कासा ३–३ या बराबरी जूवंगु खः ।

क्रोसियाया निंतिं कासाया ८५ औं मिनेटय् ओरसिकं व इन्जुरी ईया निगूगु मिनेटय् पासालिकं छगू गोल यासें कासा बराबरीइ यंकूगु खः । ओरसिकया गोलयात गोललाइन टेक्नोलोजि पाखें स्वयाः गोल बिउगु खः । स्पेनया पोस्टय् घाराघुरुया दथुइ बल गोलपोस्टया लाइनं दुने दुहां वंगु खः, तर गोल खःकि मखु धायेमफुगु अवस्थाय् गोललाइन प्रविधि पाखें गोल बिउगु खः । थ्व प्रविधि कथं यदि बल गोललाइन पार यानाः दुहां वन धाःसा रेफ्रीया घडी भाइब्रेट जुइ । रेफ्रीं थःगु घडी भाइब्रेट जूगु संकेत बिसें गोल बिउगु खः ।

आत्मघाती गोल यासें भिलेनया छवि दयेकूम्ह गोलकिपर सिमानं थौंया कासाय् स्वंगू प्यंगू उत्कृष्ट बचाउ नं याःगु खः ।

सम्बन्धित बुखँ

LEAVE YOUR COMMENTS